England: Burnley sótti þrjú stig á Anfield

Englandsmeistarar Liverpool tóku á móti Burnley í áhugaverðum slag í ensku úrvalsdeildinni.

Leikurinn var mikilvægur fyrir bæði lið sem eru í hörkubaráttu á sitthvorum enda töflunnar.

Liverpool stjórnaði leiknum, hélt boltanum mikið og átti margar marktilraunir sem hæfðu þó sjaldnast rammann.

Varnarmenn Burnley voru duglegir að henda sér fyrir skot og var lítið um dauðafæri. Divock Origi fékk besta færi heimamanna á 42. mínútu þegar hann slapp í gegn eftir varnarmistök Ben Mee en skaut í slána úr algjöru dauðafæri.

Liverpool hélt áfram að stjórna gangi mála í síðari hálfleik en fékk ekki mikið af dauðafærum. Gestirnir voru skeinuhættir og þurfti Alisson Becker að verja meistaralega frá Ashley Barnes til að halda stöðunni markalausri.

Mohamed Salah, Roberto Firmino og Jóhanni Berg Guðmundssyni var skipt inn til að hafa áhrif á leikinn og kom næsta mark á lokakaflanum. Alisson braut þá á Barnes innan vítateigs og steig sóknarmaðurinn stóri sjálfur á vítapunktinn og skoraði af miklu öryggi.

Liverpool hélt áfram að setja þunga pressu á andstæðingana en varnarleikur Burnley var til fyrirmyndar þar sem menn voru hvergi smeykir við að henda sér fyrir hvert skotið fætur öðru.

Lærisveinar Sean Dyche héldu út uppbótartíma og skópu frábæran sigur á Englandsmeisturunum. Burnley er sjö stigum fyrir ofan fallsvæðið eftir sigurinn. Liverpool er aðeins með þrjú stig úr síðustu fimm leikjum og situr í fjórða sæti, sex stigum eftir toppliði Manchester United.

Það tekur tíma fyrir stöðutöfluna að uppfærast.