Gunnar Nielsen farinn í þjálfun

Gunnar Nielsen er kominn út í þjálfun en HB í Þórshöfn í Færeyjum hefur tilkynnt að hann sé nýr þjálfari U17 ára liðs félagsins.

Gunnar er fyrrum landsliðsmarkvörður Færeyja en hann gekk í raðir FH árið 2016 eftir að hafa leikið með Stjörnunni tímabilið 2015.

Gunnar varð Íslandsmeistari á sínu fyrsta ári með FH en hann lék með liðinu út sumarið 2022.

Hann lagði þá hanskana á hilluna en á ferli sínum lék hann 70 landsleiki. Hann afrekaði það að spila einn leik í ensku úrvalsdeildinni en hann kom af bekknum hjá Manchester City í jafntefli gegn Arsenal 2010.

Hann er nú búinn að taka að sér þjálfun í yngri flokkum HB en hann og Tróndur Jensen, fyrrum leikmaður HB, hafa verið ráðnir þjálfarar U17 liðsins.