Jökull: Þurfti að vinna af mér rassgatið til að komast að hjá Reading

„Voru líka með stjörnustæla og ég var ekki hrifinn af því"

Barátta við Breiðablik
Æfði Jökull alltaf með Aftureldingu þegar hann bjó á Íslandi?

„Já ég var alltaf hjá Aftureldingu í yngri flokkunum. Það er mitt lið og verður alltaf mitt lið," sagði Jökull við Fótbolta.net.

Í 'hinni hliðinni' sagði Jökull frá því að mestu vonbrigðin væru töpin gegn Breiðabliki. Var rígur á milli Aftureldingu og Breiðabliks?

„Við vorum alltaf rosalega gott lið í yngri flokkunum. Ef það var eitthvað lið sem gat unnið okkur þá var það Breiðablik. Leikmenn hjá þeim voru líka með einhverja stjörnustæla og ég var ekki hrifinn af því."

„Ég labbaði svo sannarlega ekki inn í hlutina hjá félaginu"
Þurfti að hafa mikið fyrir því að fá að æfa hjá Reading
Fyrstu skrefin hjá Reading. Skrifað er undir fyrsta alvöru samninginn árið 2017 en fjölskyldan fer út 2014. Hvernig voru fyrstu skrefin? Fékk Jökull greiða leið inn í unglingaliðið þegar Axel skrifaði undir?

„Þetta byrjaði einmitt allt þegar Axel skrifaði undir hjá Reading. Ég labbaði svo sannarlega ekki inn í hlutina hjá félaginu og þurfti að vinna af mér rassgatið til að komast inn í akademíuna. Það er þannig hjá Reading að það er ekki hver sem er sem fær að komast í akademíuna. Það er eitthvað sem ég fékk að upplifa frá fyrsta degi."

Lánaður í utandeildina
Í marsmánuði 2018 var Jökull lánaður í utandeildina. Hann lék með Camberley. Hvernig var sú reynsla?

„Það var mjög skemmtilegt að spila fyrir Camberley. Ég var bara sextán ára að spila fyrir þá. Reading vildi að ég myndi fá reynslu þetta ungur og þetta var frábær leið til þess. Ég var ekki lengi þarna en þetta fór allt í reynslubankann."

„Stórlið sem hafði áhuga og mun ég alltaf vera stoltur af því."
Orðaður við Arsenal
Árið 2017 var Arsenal að skoða Jökul. Hvernig kom það til og af hverju varð ekkert úr skiptum yfir í Arsenal?

„Ég var í U16 hjá Reading þegar umboðsmaðurinn minn hringir í mig og segir að Arsenal væru mjög áhugasamir að fá mig."

„Ég varð mjög stoltur á því augnabliki, stórlið sem hafði áhuga og mun ég alltaf vera stoltur af því."

„Ef ég á að vera alveg hreinskilinn þá held ég að það hefði ekki verið skynsamlegt að fara. Reading er með eina bestu markmanns akademíu Englands og miklu líklegra að fá tækifæri með aðalliðinu hér."

„Ég er rosalega heppinn að ég er að spila í dag."
Tvö höfuðhögg seinni hluta ársins 2018
Í ágúst 2018 var sagt frá því að Jökull væri frá vegna höfuðhöggs. Jökull sagði hér að ofan frá því að þetta hefði gerst á meðan hann var á láni hjá Hungerford í utandeildinni. Rúmum mánuði seinna er sagt frá því að Jökull hefði fengið annað höfuðhögg. Hvernig voru þessir mánuðir?

„Þetta er skrýtnasta upplifun sem ég hef lent í mínu lífi. Allt í kringum þetta var mjög skrýtið."

„Fólk í sjúkraliðinu sagði að það hefði aldrei séð svona í sínu lífi. Ég er rosalega heppinn að ég er að spila í dag."

„Ég fór í fullt af prófum og það kom út að ég fékk bloðdropa í heilann og það var mikið stress vegna þess. En sem betur fer var ég bara frá fótbolta í tvo mánuði."

„Það er magnað þegar maður pælir í því núna, Það helsta sem ég lærði af þessu er að vera þakklátur á hverjum einasta degi að vera spila fótbolta og að njóta þess að vera til. Þetta hefði vel getað farið svo miklu verr en það gerði."

„Snýst allt um hugarfar."
Hnémeiðsli árið 2017
Árið 2017 var Jökull að glíma við meiðsli á hné. Í frétt hér á Fótbolta.net kemur fram í október að Jökull hafi ekki spilað síðan í mars og eftir að Jökull hafði byrjað aftur að æfa höfðu meiðslin tekið sig upp á ný.

Hvernig var þessi tími fyrir markvörðinn?
„Hnémeiðslin voru það erfiðasta sem ég hef þurft að eiga við í lífi mínu, ég var frá í heilt ár. Ég fór í gegnum hluti sem ég hef aldrei þurft að fara í gegnum áður, líkamlega og andlega séð."

„En eins og með allt ég hugsaði: ‘heyrðu þetta er bara önnur áskorun’ og ég reyndi að nýta mér þennan tíma, fór í ræktina og byrjaði að gera hluti sem ég gat ekki einbeitt mér jafnmikið að þegar ég var að spila."

„Þegar ég lít til baka þá er ég mjög þakklátur fyrir þetta, þetta snýst allt um hugarfar. Þú getur alltaf breytt slæmum hlut í góðan."

Á bekknum hjá aðalliðinu í febrúar
Nú er aðeins spólað fram í tímann. Jökull var í hópnum hjá Reading í bikarleik í febrúar í fyrsta sinn á ferlinum. Síðasta sumar lék Jökull með aðalliðinu á undirbúningstímabilinu. Hvernig var aðdragandinn að valinu í febrúar?

„Það var risa upplifun þegar þjálfarinn segir við mig að hann vildi fá mig með á undirbúningsferðina með aðalliðinu, við fórum til Spánar."

„Ég hringdi í mömmu og pabba strax, þetta var svo klikkað. Það voru ekki margir markmenn einmitt á þeim tímapunkti í aðalliðnu þannig ég fékk risa séns. Og sem betur fer gekk miklu betur en ég hafði þorað að vona. Ég fékk mikið hrós og þjálfararnir sögðu að þeim litist mjög vel á mig."

„Ég er búinn að vera æfa með aðalliðinu allt tímabilið og er búinn að vera þriðji kostur allt tímabilið. Ég er búinn að fá einu sinni að vera á bekknum sem var rugluð upplifun. Núna í kjölfarið held ég áfram að vinna hart af mér til að fá tækifæri til að spila minn fyrsta keppnisleik með aðalliðinu."

Charlie Adam skaut á holdafar Jökuls
Í gær sagði Jökull frá því í 'Hinni hliðinni' að Charlie Adam hafi eitt sinn klipið í sig og sagt sig vera of feitan. Hvernig var sú vika og fannst Jökli hann hafa átt það skilið?

„Ég viðurkenni að þetta var ákveðið högg. Maðurinn er risastórt nafn í fótboltanum (fyrrum leikmaður Liverpool) og þetta var ekkert frábær tilfinning."

„Ég átti þetta samt svo sannarlega skilið og hann hjálpaði mér bara að rífa mig í gang og ég gerði það svo sannarlega."

Kom inn í breska skólakerfið
Hvernig fór með námið þegar Jökull flutti út?

„Ég fór í breskan strákaskóla í 8. -10. bekk. Ég get alveg sagt frá því að það var ekki auðvelt. Ég þurfti að vera í bláum skólabúning og í skyrtu með bindi. Það er ekki alveg ég og mér leið ekki eins og ég væri í toppmálum þarna."

„Ég kláraði samt unglingastigið og er stoltur af því. Það eru ekki allir sem ná því."

Markmannshanskarnir
Fréttaritari gerði þau klaufalegu mistök í 'Hinni hliðinni' að spyrja markvörð út í hvernig skóm hann spilar í, í stað þess að spyrja út í markmannshanskana sem eru auðvitað aðalatriðið.

Hvernig markmannshanska notar Jökull?
„Ég nota markmannshanska frá Rinat. Ég ráðlegg öllum markmönnum á Íslandi að kaupa sér par þar. Hanskarnir eru geggjaðir," sagði Jökull að lokum.

Sjá einnig:
Hin hliðin - Jökull Andrésson (Reading)