Flick: Ég hef ekki sagt Balde að yfirgefa félagið

Spænski bakvörðurinn vill yfirgefa Barcelona þar sem hann telur sig ekki gegna nægilega mikilvægu hlutverki hjá félaginu.

Hann er tilbúinn í nýtt ævintýri og hefur Manchester United sýnt honum áhuga síðustu vikur.

United er í sambandi við Barcelona en Hansi Flick vill taka skýrt fram að hann hafi ekki sagt Balde að finna sér nýtt félag.

„Ég hef ekki sagt Balde að yfirgefa félagið. Ég ræddi við hann í gær og bað hann um að hugsa málið. Við ætlum síðan að setjast aftur niður í dag,“ sagði Flick.

Gavi meiddist aftur á hné

Flick ræddi einnig hnémeiðsli Gavi. Miðjumaðurinn þurfti að fara af velli undir lok fyrri hálfleiks í 5-0 sigri Barcelona á Elche í fyrsta leik liðsins á tímabilinu.

Meiðslin virðast ekki eins alvarleg og óttast var í fyrstu. Gavi hefur verið afar óheppinn með meiðsli síðustu ár og tvisvar orðið fyrir alvarlegum hnémeiðslum.

„Meiðslin eru í hnénu. Við verðum að bíða og sjá en staðan virðist aðeins betri en við óttuðumst. Honum leið mun betur eftir leikinn en hann fer í myndatöku og þá sjáum við betur hversu alvarlegt þetta er,“ sagði Flick.