Fótbolti.net

mán 25. september 2023 17:22

Sæbjörn Þór Þórbergsson Steinke

Með takkafar á sköflungi og ökkla á sitthvorum fætinum - „Myndi hjálpa dómurum að geta litið á þetta"

Leifur Andri

Mynd: Jónína Guðbjörg Guðbjartsdóttir

Sindri Snær.

Mynd: Fótbolti.net - Hafliði Breiðfjörð

Arnar Þór Stefánsson lyfti upp gulu spjaldi.

Mynd: Fótbolti.net - Hafliði Breiðfjörð

„Það er takkafar á sköflungnum og hinum ökklanum," sagði Leifur Andri Leifsson, fyrirliði HK, um tæklinguna sem hann varð fyrir í leiknum gegn Keflavík í gær.

Sindri Snær Magnússon, miðjumaður Keflavíkur, var stálheppinn að fá ekki rautt spjald og á sama tíma stálheppinn að meiða Leif ekki illa þegar hann fór af krafti með takkana á undan í návígi við miðvörðinn. Fótbolti.net ræddi við Leif í dag.

Sjá einnig:
Sakar Sindra um að hafa reynt að fótbrjóta Leif - „Hvernig geta þrír gæjar verið svona ógeðslega lélegir?“

Lestu um leikinn: Keflavík 2 - 1 HK

Trúði ekki litnum á spjaldinu
„Ég sá ekki þegar gula spjaldið fór á loft, svo heyrði ég það frá strákunum og ég eiginlega bara trúði því ekki. Mig verkjaði á sköflunginn og ökklann á sitthvorum fætinum, það var nóg fyrir mig til að átta mig á því að þetta átti að vera allt annar litur," sagði Leifur.

„Ég held ég hafi verið heppinn, hann fór í sköflunginn á fætinum sem var á lofti og svo steig hann á ökklann á stoðfætinum. Þetta hefði verið miklu verra ef ég hefði verið standandi í báðar fætur, þá hefði sköflungurinn verið í öðrum málum en með nokkur takkaför."

Hlutir sem gerðu mann pirraðan
Að lenda í mótlæti eins og að fá ekki þann dóm sem manni finnst borðleggjandi, er maður fljótur að gleyma þessu eða er maður pirraður út leikinn?

„Ég var verkjaður, en sem betur var það ekki það mikill verkur. Við vorum undir og það var einhvern veginn allt sem fór extra mikið í taugarnar á manni, sérstaklega eftir svona atvik. Svo stuttu seinna þá er brotið á Örvari þegar hann er að sleppa í gegn, við sleppum í gegn út frá því, dómarinn flautar og gefur gult á þann sem braut á Örvari. Það var aftasti varnarmaður, rautt spjald fyrir mér. Í staðinn fyrir að vera sloppnir í gegn fáum við aukaspyrnu út á velli og þeir fá gult. Það voru hlutir sem gerðu mann frekar pirraðan."

„Í leiknum á undan var víti sem var brot fyrir utan teig. Þetta er orðið frekar pirrandi."

„Það er svolítið síðan við unnum leik og það er auðvelt að sökkva sér í þessa hluti sem maður verður að passa sig að gera ekki. Dómarar gera mistök eins og við flestir."

Bólginn en vonast til að geta spilað næsta leik
Ertu haltur?

„Já, ég er sennilega ekkert að fara æfa í dag," sagði fyrirliðinn sem vonast þó til að geta spilað á fimmtudaginn. „Þetta er smá bólga, maður ætti að geta hlaupið sig í gegnum það."

Vill að eitthvað sé hægt að gera svo réttlætinu sé fullnægt
En hvað er hægt er að gera, það hjálpar varla mikið að fá afsökunarbeiðni, en er eitthvað hægt að gera til að útrýma svona tæklingum?

„Það sem maður spyr sig kannski mest að er að það myndi auðvitað hjálpa dómurum að geta litið á þetta. Núna eru flest lið með iPada og horfandi á atvikin aftur á bekknum. Það hlýtur að vera hægt að stoppa leikinn þegar það eru svona augljós atvik, fara og kíkja á upptöku. Það er ekki hægt að gera það í öllum atvikum, en þegar þau eru svona augljós og dómararnir gera klár mistök - að það sé eitthvað hægt að gera svo réttlætinu sé fullnægt," sagði Leifur.

Sindri hafi ekki ætlað að meiða sig
Hann tók fram að hann sé viss um að Sindri hafi ekki farið inn í návígið með það sem markmið að meiða.

„Ég geri mér fulla grein að hann var aldrei með þann ásetning að reyna meiða mig eða neitt svoleiðis. Ég þekki hann ágætlega og hann var aldrei að fara í þessa tæklingu til að fara í mig, var bara að reyna við boltann, en gerði það kannski groddalega," sagði Leifur að lokum. Atvikið má sjá hér að neðan.