Spáin:
1. ?
2. ?
3. ?
4. ?
5. ?
6. ?
7. Dalvík/Reynir, 60 stig
8. Víðir, 58 stig
9. KFG, 43 stig
10. Fjarðabyggð, 36 stig
11. Leiknir F., 23 stig
12. Tindastóll, 21 stig

7. Dalvík/Reynir
Dalvík/Reynir spilaði frábærlega framan af í 3. deildinni í fyrra en dalaði mjög mikið undir restina. Dalvík/Reynir vann ekki leik í síðustu umferðunum, en samt komst liðið upp. Það verður fróðlegt að fylgjast með þeim í sumar.

Þjálfarinn: Óskar Bragason tók við eftir síðustu leiktíð. Hann og Sveinn Þór Steingrímsson skiptu um störf. Sveinn fór og gerðist aðstoðarþjálfari KA og Óskar, sem var aðstoðarþjálfari KA, tók við Dalvík/Reyni.

Styrkleikar: Dalvíkingar spiluðu frábæran varnarleik á síðasta tímabili og var það klárlega aðalsmerki liðsins. Þeir fengu aðeins á sig 16 mörk á síðustu leiktíð í 3. deildinni. Ef þeir ná að vera eins skipulagðir og þeir voru í fyrra þá verður mjög erfitt að mæta Dalvíkingum. Liðið tapaði ekki heimaleik á síðustu leiktíð og það er erfitt að fara á Dalvík. Á dögunum vann Dalvík/Reynir magnaðan sigur á nágrönnum sínum í Þór í Mjólkurbikarnum. Góður árangur á undirbúningstímabilinu mun veita liðinu sjálfstraust fyrir framhaldið.

Veikleikar: Þó varnarleikurinn hafi verið frábær í fyrra þá var sóknarleikurinn ekki sérstakur miðað við mörg önnur lið í 3. deildinni. Liðið hefur þó verið að skora mikið á undirbúningstímabilinu og er það góðs viti. Bræðurnir Nökkvi Þeyr og Þorri Mar voru frábærir í fyrra en þeir yfirgáfu félagið og fóru til KA. Verður skarð þeirra fyllt?

Lykilmenn: Borja Lopez Laguna, Kelvin W. Sarkorh, Númi Kárason.

Gaman að fylgjast með: Sveinn Margeir Hauksson. Strákur fæddur 2001 sem var valinn í lið ársins í 3. deildinni í fyrra. Verður gaman að sjá hvort að hann geti tekið enn meiri framförum í ár.

Óskar Bragason, þjálfari Dalvíkur/Reynis:
„Spáin er á pari við það sem ég bjóst við. Við erum nýliðar í deildinni, þannig að við rennum dálítið blint í sjóinn með styrk annara liða, sérstaklega liðanna á Suður- og Vesturlandi. En okkur hefur gengið ágætlega í vetur og vonandi getum við tekið það með okkur inn í mótið. Fyrsta markmið nýliða hlýtur alltaf að vera að halda sæti sínu í deildinni, en við þjálfarar, leikmenn og stjórn ætlum okkur meira en það. Við höldum því samt bara fyrir okkur. Við erum ánægðir með hópinn í dag, en við erum með augu og eyru opin ef eitthvað bíðst sem styrkir okkur."

Komnir:
Alberto Aragoneses frá Spáni
Baldvin Ingason frá Þór
Benóný Sigurðarson frá KF
Borja López Laguna frá Spáni
Gunnlaugur Bjarnar Baldursson frá Einherja
Númi Kárason frá Einherja
Viktor Daði Sævaldsson frá Einherja
Páll Sigurvin Magnússon frá KF

Farnir:
Angantýr Máni Gautason í KA
Nökkvi Þeyr Þórisson í KA
Þorri Mar Þórisson í KA
John S. Connolly til Norður-Írlands

Fyrstu leikir Dalvíkur/Reynis:
5. maí gegn Þrótti V. (úti)
11. maí gegn KFG (úti)
18. maí gegn Leikni F. (heima)