Jayden Danns kom inn á sem varamaður hjá Liverpool í kvöld og innsiglaði 3-0 sigur liðsins á Southampton í enska bikarnum í kvöld.
Danns er aðeins 18 ára gamall og var að leika sinn þriðja leik fyrir liðið. Hann kom inn á í stöðunni 1-0 en jafnaldri hans, Lewis Koumas, kom Liverpool yfir í sínum fyrsta leik.
Danns gerði sér lítið fyrir og skoraði tvö mörk.
„Þetta er draumur sem er orðinn að veruleika. Ég hef stutt þetta lið síðan ég fæddist. Það er óraunverulegt að koma inn á og skora fyrir framan The Kop, þetta virðist ekki raunverulegt, þetta er eins og bíómynd," sagði Danns.
„Seinna markið var hrein gleði, mér leið eins og það væri ekki að koma, ég var ánægður að skora eitt, ég var búinn að missa alla stjórn. Pabbi grét þegar ég lék minn fyrsta leik svo ég veit ekki hvað hann gerir núna."
