„Fyrst og fremst vil ég segja til hamingju Þróttarar með sigurinn. Ég óska þeim allt hið besta í sumar, þeir eru frábært lið og mjög vel þjálfað," sagði Tomasz Luba þjálfari Víkings Ólafsvík eftir 3-1 tap fyrir Þrótturum í Mjólkurbikarnum.
Lestu um leikinn: Þróttur R. 3 - 1 Víkingur Ó.
„Þetta var mjög krefjandi verkefni hjá okkur í dag. Við vorum aðeins óheppnir að fá Þróttarana strax á þessum tímapunkti. Í fyrri hálfleik voru Þróttarar miklu betri, en ég er mjög ánægður með seinni hálfleikinn. Við vorum mjög góðir, mjög agressívir, þetta var í raun 50/50 leikur í seinni hálfleik. Við þurfum að taka þennan seinni hálfleik með okkur í framtíðina," sagði Tomasz.
Þróttarar eru einni deil fyrir ofan Víkinga og auk þess eru þeir líkast til eitt besta lið Lengjudeildarinnar. Tomasz segir að það hafi verið góð áskorun að máta sig við þá.
„Það er alltaf gaman að spila á móti svona liðum, og gaman að leikgreina þá. Þú verður alltaf betri og betri ef þú spilar gegn svona liðum. Þróttararnir sýndu okkur í dag, okkar veikleika. Bara geggjað að spila á móti svona liðum, engin spurning. Það er ekkert eitthvað lélegt að koma hingað og tapa 3-1, mér fannst við mjög góðir í seinni hálfleik, sem eitthvað sem við ætlum að taka með," sagði Tomasz.
Víkingar eru í 2. deild, en sú deild lítur út fyrir að verði mjög sterk á komandi tímabili.
„Það sem er mikilvægt hjá okkur er að byrja mótið vel og hugsa um næsta leik. Ég get sagt meira eftir 10. umferð, hvar við verðum og hvernig við spilum. Ég er meðvitaður um að þessi deild verður miklu sterkari en hún var í fyrra, Selfoss, Fjölnir, Haukar. Þetta eru flott og stór lið. Engin spurning að Víkingur Ólafsvík vill vera að berjast við þá, við viljum vera allan tíman í toppbaráttu, það er okkar markmið. Það er ennþá langt í mót, markmiðið okkar núna er að æfa vel, kynnast enn betur, fara í allskonar atriði á vellinum, svo bara sjáum við hvað gerist. Ég er mjög bjartsýnn að þetta lið, þessir strákar sem eru hjá okkur eru mjög efnilegir og flottir karakterar," sagði Tomasz.
Viðtalið má sjá í heild sinni í spilaranum hér fyrir ofan.
