Breiðablik er komið aftur á sigurbraut eftir að liðið fagnaði 3-2 sigri á KR í Bestu deild karla á Meistaravöllum í kvöld. Þrjú mörk voru skoruð á síðustu mínútum leiksins.

KR-ingar klæddust gamaldags treyjum við fremur erfiðar vallaraðstæður í Frostaskjóli en samt sem áður var ágætis fótbolti spilaður í leiknum.

Liðin sköpuðu sér bæði ágætis sénsa en Blikar voru þó líklegri til að skora. Staðan í hálfleik var markalaus en fjörið fór almennilega af stað í þeim síðari.

Kristinn Steindórsson skoraði fyrsta mark leiksins. Viktor Karl Einarsson fékk nægan tíma til að koma boltanum inn í teiginn, þar sem Kristinn var mættur eftir að hafa farið á milli tveggja varnarmanna og sett boltann í netið.

Viktor Örn Margeirsson tvöfaldaði forystuna með skoti af stuttu færi eftir hornspyrnu Höskuldar Gunnlaugssonar.

KR-ingar náðu að bíta frá sér. Stefán Árni Geirsson minnkaði muninn. Aron Kristófer Lárusson átti skot sem Anton Ari Einarsson varði út á Stefán sem setti boltann í stöng og inn.

Blikar svöruðu strax eftir skelfileg mistök Guy Smit. Jason Daði Svanþórsson stal boltanum af Smit áður en hann setti boltann í netið. Smit verið að gera furðuleg mistök í síðustu leikjum.

Dramatíkinni var ekki lokið. Eyþór Aron Wöhler fiskaði vítaspyrnu nokkrum mínútum síðar og var það Benoný Breki Andrésson sem skoraði af öryggi úr spyrnunni.

Stórskemmtilegur endir á leiknum en það eru Blikar sem hirða öll stigin og eru því komnir aftur á sigurbraut. Þriðji sigur liðsins á tímabilinu en KR-ingar hafa nú tapað tveimur deildarleikjum í röð og eru því aðeins með 6 stig.