Fotbolti.net
28.07.16 - 11:55
Magnús Már Einarsson

Færeyskur landsliðsmaður í FH (Staðfest)

Kaj Leo í Bartalsstovu og Jón Rúnar Halldórsson.

Kaj Leo í Bartalsstovu og Jón Rúnar Halldórsson.

Canon

Mynd: FH

FH hefur gert samning út tímabilið við færeyska landsliðsmanninn Kaj Leo í Bartalsstovu.

Kaj Leo er 25 ára gamall kantmaður en hann á átta landsleiki að baki með Færeyingum og sex unglingaliðslandsleiki.
Kaj Leo er alinn upp hjá Vikingur Gota í Færeyjum þar sem hann spilaði fjögur heil tímabil með aðalliði félagsins og skoraði 23 mörk í 102 leikjum.

Síðast lék hann með Dinamo Búkarest í Rúmeníu en þar áður spilaði hann með Levanger FK frá Noregi.

„Knattspyrnudeild FH lýsir yfir mikilli ánægju að krækja í Kaj Leo og bindur vonir við að hann styrki Fimleikafélagið í þeirri baráttu sem framundan er,\" segir á Facebook síðu Fhingar.net.

Heimir Guðjónsson, þjálfari FH, sagði fyrr í mánuðinum að liðið væri í leit að liðsstyrk framarlega á vellinum.

„Við FH-ingar erum mjög ánægðir að fá til okkar Kaj Leo í Bartalsstovu. Kaj er leikmaður sem mun gefa okkur nýja vídd í sóknarleik,\" segir Heimir á Facebook síðu fhingar.net.

FH er á toppnum í Pepsi-deildinni en liðið mætir ÍBV í undanúrslitum Borgunarbikarsins í kvöld. Kaj Leo er ekki kominn með leikheimild fyrir þann leik og verður því ekki með í kvöld. Hann getur hins vegar spilað sinn fyrsta leik gegn ÍA á miðvikudaginn.
Slapp
Fotbolti.net

© Copyright 2002-2026 Fotbolti.net / Fotbolti Ehf. All rights reserved.