Þorsteinn Halldórsson ræddi við íslenska fjölmiðlamenn á fréttamannafundi eftir dráttinn.

„Þetta leggst bara vel í mig, ég held þetta sé fínn riðill og við séum í ágætis málum," sagði Steini.

Sem City aðdáanda finnst mér það í lagi
Ertu spenntur að kíkja til Rotherham? „Ja, ég veit það ekki. Jú, jú, það er örugglega ágætt að fara þangað. Ég hef svo sem ekekrt verið að spá í því hvar við erum að fara spila þessa þrjá leiki. Við sjáum bara til með það en ég er bara spenntur fyrir keppninni og spenntur fyrir þessum leikjum."

Steini er stuðningsmaður Manchester City en Ísland mun spila á keppnisvelli kvennaliðs félagsins. „Sem City aðdáanda finnst mér það allt í lagi en persónulega finnst mér það alltof lítill völlur. Maður hefur áhyggjur af því að í einhverjum tilfellum verði Íslendingar í vandræðum með að fá miða á völlinn."

Þetta er riðillinn sem við erum í
Hefðiru viljað fá einhvern annan riðil frekar, A-riðil kannski? „Nei, þetta er bara riðill sem við lendum í og við bara vinnum út frá því. Það hefði verið gaman að spila opnunarleikinn og allt það en í sjálfu sér snýst þetta bara um það að þetta er riðilinn sem við erum í. Við einbeitum okkur að því og hættum að láta okkur dreyma um eitthvað."

Eigum ágætis möguleika
Það er kannski svolítið snemmt að segja til um það en hvernig meturu möguleikana á þessum tímapunkti á því að komast áfram?

„Bara fína sko, við spiluðum tvo hörkuleiki við Ítalíu í apríl [Ítalía vann fyrri leikinn 1-0 og seinni leikurinn fór 1-1] og Frakkarnir eru alltaf sterkir. Belgía er lið sem við eigum alveg að geta unnið líka. Ég tel okkur eiga ágætis möguleika."

Ísland spilaði síðast við Frakkland fyrir tveimur árum, vináttuleik í Frakklandi, og tapaði 4-0. Ísland mætti Belgíu í undankeppni fyrir EM 2013, gerði jafntefli á heimavelli og tapaði á útivelli 1-0. Ísland vann svo Belgíu á Algarve árið 2016, 1-2.

Hvað geturu sagt okkur um Belgíu og Frakkland? „Frakkarnir eru góðir en við teljum okkur vera í framför og eigum góða möguleika gegn Frökkum. Belgana veit ég ekki þannig um en ef miðað við stöðu þeirra á styrkleikalistum eirra í og þeirra andstæðinga að undanförnu þá tel ég okkur eiga ágætis möguleika á móti þeim."

Aðrir sem fara í að leikgreina hin liðin
Hvað tekur við núna þegar ljóst er hvaða liðum við mætum, hafiði skoðað þessa andstæðinga eitthvað nú þegar eða fer leikgreining og undirbúningur í gang núna?

„Við byrjum að leikgreina þá leiki sem þessi lið spila í nóvember og svo í gluggunum í kjölfarið. Mitt verkefni verður að fókusa á nóvembergluggann hjá okkur. Það fara einhverjir aðrir í það að fara á leiki og svoleiðis. Síðan hefst það hjá mér eftir áramót að byrja að skoða þetta. Hópurinn í kringum liðið núna fókusar á undankeppni HM. Það fara aðrir aðilar í það að sjá hin liðin og leikgreina þau."

„Veðrið er fínt hérna," sagði Steini óspurður að lokum.