Besti leikmaður ísraelsku deildarinnar seldur - Fær að spila gegn Víkingum í dag

Hapoel tilkynnti fyrir nokkrum dögum síðan að Kings Kangwa verði seldur til gríska stórliðsins og Víkingsbananum, Panathinaikos.

Félagið kaupir hann á um 4 milljónir evra sem er næst stærsta salan í sögu Hapoel. Panathinaikos hafnaði í 4. sæti grísku deildarinnar á síðustu leiktíð og tekur því þátt í undankeppni Sambandsdeildarinnar.

Liðið er komið í 2. umferðina en þar er staðan eftir fyrri leik liðsins við Paksi SE, 2-1 Grikkjunum í vil.

Hapoel hefur tilkynnt að Kings fái að spila leik kvöldsins gegn Víkingum í 2. umferð í undankeppni Meistaradeildarinnar en það verður jafnframt kveðjuleikur hans fyrir félagið.

Leikurinn fer fram í Ungverjalandi vegna ástandsins í Ísrael og fær hann því ekki að spila fyrir framan alla stuðningsmenn liðsins þar sem aðeins er gert ráð fyrir um 200-300 ísraelskum stuðningsmönnum á völlinn.