Leikvangurinn sem mun leysa San Siro af hólmi í Mílanó

Inter og AC Milan hafa loks kynnt áætlanir um nýjan leikvang sem mun taka 71.500 áhorfendur. Generali leikvangurinn mun taka við af hinum goðsagnakennda San Siro en framkvæmdir munu ekki hefjast fyrr en árið 2028.

Undirbúningur verkefnisins hefur staðið yfir í meira en áratug, en vegna ýmissa hindrana var upphaflega hönnunin lögð til hliðar.

Nýja hönnunin var kynnt í Mílanó í kvöld. Sömu arkitektar komu einnig að hönnun nýja Wembley í Lundúnum.

Grindarvirki utan á leikvangnum sækir innblástur í dómkirkjuna í Mílanó. Heitustu stuðningsmenn Inter verða bak við markið í norðurhlutanum en suðurhlutinn er ætlaður stuðningsmönnum AC Milan.