Helgi, fæddur 1999, þykir mikið efni og skoraði hann 15 mörk með Fram í Inkasso-deildinni í sumar. Í heildina gerði hann 19 mörk í 25 leikjum í deild og bikar. Hann var valinn efnilegastur í Inkasso-deildinni í vali fyrirliða og þjálfara deildarinnar.

Helgi, sem hefur alla sína tíð spilað fyrir Fram, á leiki að baki fyrir U16 og U17 lið Íslands.

„Knattspyrnudeild Víkings hefur haft augastað á Helga frá því síðasta haust og fagnar því að hafa nú gert samning við þennan unga leikmann sem bætist í flóru þeirra efnilegu leikmanna sem fyrir eru hjá félaginu," segir í yfirlýsingu frá félaginu.

Víkingur R. vann Mjólkurbikarinn í sumar og er að byggja öflugan hóp sem spilar sóknarþenkjandi bolta. Liðið endaði í sjöunda sæti Pepsi Max-deildarinnar á dögunum, með 28 stig.