Víðir heimsóttu Íslands-og bikarmeistara Víkinga í 32-liða úrslitum Mjólkurbikarsins í dag. Víðir vann fotbolti.net bikarinn í fyrra og voru því bikarmeistarar síðata árs að mætast í dag.
Lestu um leikinn: Víkingur R. 4 - 1 Víðir
„Rosalega stoltur. Við lögðum upp með plan og við vildum líka að við myndum líka bara líta vel út, þá meina ég að líta vel út sem lið og værum að gefa allt í þetta og líta út fyrir að vera með eitthvað plan og að þetta færi ekki í einhverja vitleysu og svoleiðis og menn lögðu bara allt í þetta." Sagði Sveinn Þór Steingrímsson þjálfari Víðis eftir leikinn í dag.
„Við gáfum Víkingum bara nokkuð góðan leik held ég, allavega lengst um og svo er bara kominn þreyta í þetta og annað hjá okkur og þeir á allt öðrum stað heldur en við í gæðum, formi og allt það. Bara eðlilega."
„Það að við höfum náð að gefa þeim svona góðan leik í þetta góðan tíma og komist yfir í leiknum. Þetta eru bara allt minningar og mun gefa okkur alveg helling inn í tímabilið þannig ég er bara mjög stoltur."
Víðir náði forystu í leiknum með stórkostlegu marki og var Sveinn Þór að vonum ánægður með það.
„Það var bara geggjað og bara líka fyrir okkar lið að komast yfir á móti besta liði Íslands í dag, á þeirra heimavelli í þessari stemningu og upplifa það, það er minning og það er geðveikt. Fögnuðurinn og tilfininingarnar og allt sem fylgdi því."
„Ég held að við höfum aðeins sjokkerað þá pínulítið. Ég ætla að vona það allavega að það hafi verið þannig. Þetta var hrikalega skemmtilegt."
Nánar er rætt við Svein Þór Steingrímsson í spilaranum hér fyrir ofan.
