Við förum stigalausar heim af EM 2025. Kröftug byrjun og kröftugar lokamínútur í þessum leik en allt þar á milli var ekki gott. Takk fyrir samfylgdina, minni á viðtöl í kvöld!

Noregur fær hornspyrnu. Þær taka þetta stutt og taka sér dágóðan tíma í þetta. Halda boltanum svo bara hjá hornfánanum og ætla að láta tímann líða.

VAR herbergið er að skoða mögulegt víti, brot á Hlín inn í teignum. Heyrðu dómarinn ætlar að kíkja á þetta!!

Sveindís með boltann fyrir markið og Agla tekur hann viðstöðulaust en skotið er rétt framhjá markinu!

Glódís setur boltann upp völlinn og Dagný er komin upp að endalínu, hún nær að koma boltanum fyrir markið en Sveindís nær ekki til boltans. Amanda var ein á auðum sjó á miðjum teignum þarna.

Síðustu 5 mínútur okkar á þessu móti. Það heyrist vel í íslenskum áhorfendum sem hafa verið geggjuð á þessu móti.

Maanum fær boltann á miðjum vallarhelmingi okkar og keyrir á okkur, setur boltann til vinstri á Jensen sem er í fínu færi en á skot framhjá markinu. Noregur mun líklegri að bæta við heldur en eitthvað annað eins og staðan er núna.

Norðmenn að sundirspila okkur í enn eitt skiptið og Maanum á svo skot yfir markið af stuttu færi. Hún var rangstæð og markspyrna dæmd.

Bizet reynir að koma sér í skot en virðist misstíga sig og nær ekki skoti á markið, þetta kom eftir að við missum boltann og Noregur keyrir í bakið á okkur. Aftur eru þær með alltof mikið pláss og tíma til að refsa okkur.

Woldvik með frekar ruddalega tæklingu á Karólínu og er heppin að sleppa með spjald þarna.

Enn og aftur erum við galopnar á miðjunni og Norðmenn keyra á okkur, Gaupset fær boltann vinstra megin og finnur Maanum inn á teig sem er í góði færi en Cecilía ver og Noregur fær hornspyrnu.

Sveindís með langt innkast og það skapast hætta á teignum en Noregur hreinsar frá rétt áður en Alexandra ætlar að koma skoti á markið.

Gaupset enn og aftur að ógna hægra megin, leggur boltann á Terland sem á skot sem fer af varnarmanni og að lokum til Cecilíu.

VAR herbergið skoðar mögulega hendi inn í teig og vítaspyrnu fyrir Ísland, en það var ekkert til í því og leikurinn heldur áfram.

Sveindís með góða rispu þarna, heldur boltanum lengi og köttar inn og á fast skot sem fer rétt yfir markið. Þetta er Sveindís sem við þekkjum!

Sædís setur boltann upp á Söndru Maríu sem er komin upp að endalínu og leggur boltann út í teiginn, þar vantar íslenska treyju og Noregur kemur þessu frá.

Noregur fær aukaspyrnu í góðri fyrirgjafarstöðu eftir að Katla var dæmd brotleg. Boltinn á fjær og Guðrún skallar hann aftur fyrir. Noregur fær hornspyrnu.

Eftir góða byrjun misstum við svolítið tökin og dampinn og Noregur refsuðu okkur og fara frekar sanngjarnt með forystuna inn í hálfleik. Vonumst til að fá alvöru frammistöðu síðustu 45+ mínúturnar á þessu móti takk!

Við fáum innkast, Sveindís kastar boltanum inn á teig og Ingibjörg fleytir honum lengra. Boltinn skoppar aftarlega í teignum en þarna vantaði íslenskar treyjur, Norðmenn koma þessu frá.

Maanum og Gaupset fara illa með íslensku vörnina og Gaupset reynir svo fyrirgjöf sem fer af Guðrúnu og aftur fyrir. Cecilía grípur hornspyrnuna.

Enn eru þær að ná að opna okkur frekar auðveldlega, það kemur fyrirgjöf ætluð Gaupset en Glódís nær að setja tá í boltann og hann fer aftur fyrir.

Frekar rólegar mínútur og Noregur með góða stjórn á leiknum, við erum ekki að gera okkur líklegar.

Woldvik með háan bolta inn á teig en Cecilía örugg í teignum og grípur boltann.

Terland með fast skot af löngu færi sem fer vel framhjá markinu. Ekki gott hvað þær eru að fá mikinn tíma til að koma sér í góðar skotstöður.

Sveindís virðist ekki geta keypt sér aukaspyrnu hjá þessum dómara! Hún vinnur boltann og er að stefna á teiginn, Tuva Hansen virðist setja fótinn fyrir hana og Sveindís fellur við vítateigshornið en dómarinn sér ekkert í þessu.

Ísland að setja góða pressu eftir markið, væri gott að ná að svara fyrir þetta mark sem fyrst.

Maanum með hörkuskot rétt framhjá markinu! Karólína með lélega sendingu inn á miðjunni og Norðmenn keyra í bakið á okkur.

Gaupset finnur Terland inn á miðjum teignum, hún snýr af sér varnarmann og á skot af stuttu færi sem Cecilía slær yfir markið. Noregur að ná að opna okkur aðeins of mikið fyrir minn smekk síðustu mínútur.

Sveindís kastar boltanum inn á teig og Ingibjörg fleytir honum áfram, við náum ekki að gera okkur mat úr þessu og Noregur vinnur boltann.

Gott uppspil hjá okkar konum, Sædís kemur svo með krossinn yfir á Sveindísi sem nær að halda boltanum inná og reynir að koma boltanum inn á teiginn. Norðmenn koma þessu útaf og við fáum innkast.

Gaupset fær boltann úti vinstra megin, sækir á Guðrúnu og kemur sér framhjá henni inn á teiginn og nær góðu skoti á markið en boltinn fer af varnarmanni og í horn.

Við komum fyrri hornspyrnunni frá en Noregur heldur sókninni áfram og reynir að koma boltanum aftur inn á teig en Ingibjörg skallar aftur fyrir. Cecilía grípur svo hornspyrnuna örugglega!

Norðmenn sækja hinumegin og eru lausar í teignun, Glódís kemur boltanum aftur fyrir.

Sveindís vinnur boltann, hleypur á vörnina og er með Kötlu með sér vinstra megin, leggur boltann á hárréttum tímapunkti út á Kötlu sem er í dauðafæri en Fiskerstrand sér við henni! Ísland fær hornspyrnu.

Það er athyglisvert að Katla er fremsti maður Íslands og Sandra María er á vinstri kanti. Sveindís er hægra megin.

Norðmenn í ágætri sókn, ná að spila sig í gegnum okkur og koma sér inná teig en við komum hættunni frá.

Alexandra reynir skot af löngu færi en það er alltaf á leiðinni vel yfir markið.

Katla Tryggva sparkar þessu í gang.

Liðin að ganga út á völl og við förum að byrja þetta.

Upphitun lokið. Ég er kominn heim í hátalarakerfinu og íslenskir stuðningsmenn taka vel undir. Þetta er alltaf gæsari!

Hilmar Jökull, formaður Tólfunnar, mætti til Thun í dag og er byrjaður að syngja og tralla fyrir leik. Íslensku stuðningsmennirnir munu eiga stúkuna hér í dag.

Hérna er smá kynning á Kötlu sem er yngsti leikmaður íslenska hópsins á EM. Hún byrjar í kvöld gegn Noregi.

Það er búið að vera geggjað veður hér í Thun í dag. Það eru um 22 gráður og sólin að setjast. Umhverfið er virkilega fallegt í kringum völlinn.

Noregur er búið að vinna riðilinn og getur því leyft sér að rótera liðinu aðeins í kvöld. Það eru samt sem áður engir aukvissar sem byrja hjá þeim í kvöld eins og má sjá á félagsliðunum sem leikmennirnir spila fyrir; þarna eru til dæmis þrír leikmenn Manchester United. Byrjunarlið Noregs: 1. Cecilie Fiskerstrand (m) - Fiorentina 3. Emilie Woldvik - Rosengård 4. Tuva Hansen - Bayern München 6. Maren Mjelde - Everton 8. Vilde Bøe Risa - Atletico Madrid 16. Mathilde Harviken - Juventus 17. Celin Bizet Ildhusøy - Man Utd 18. Frida Maanum - Arsenal 19. Elisabeth Terland - Man Utd 21. Lisa Naalsund - Man Utd 22. Signe Gaupset - Brann

Katla Tryggvadóttir fær tækifærið í kvöld. Hún er tvítug og er fyrirliði Kristianstad í Svíþjóð. Virkilega spennandi leikmaður.

Sviss og Finnland mætast á sama tíma en það verður virkilega áhugaverður leikur. Bæði lið eru með þrjú stig og er þetta bara hreinn úrslitaleikur um það hvort liðið fari áfram. Sviss dugir jafntefli en ef þú spyrð mig, þá vona ég að Finnland fari áfram. Hafa heillað mig mikið á þessu móti.

Það var ótrúlega gaman að labba í gegnum stuðningsmannasvæði Íslands í Thun í dag. Þetta byrjaði svolítið rólega en þegar líða tók á daginn þá fóru íslenskir stuðningsmenn að fjölmenna og það myndaðist eiginlega bara þjóðhátíðarstemning í miðbæ Thun. Íslendingar verða í meirihluta í stúkunni í kvöld og við ætlum að enda þetta með stæl.

Noregur hefur náð markmiði sínu að komast áfram úr riðlinum á Evrópumótinu í Sviss. Liðið er búið að vinna riðilinn fyrir leik sinn gegn Íslandi í kvöld. En samt sem áður hefur frammistaða liðsins vakið mikið umtal í heimalandinu og nágrannalöndunum og hefur liðið fengið harða gagnrýni þrátt fyrir góð úrslit.

Ísland hefur tvisvar mætt Noregi á þessu ári í Þjóðadeildinni og enduðu þeir leikir báðir með jafntefli. Fyrri leikurinn á Þróttaravelli endaði með markalausu jafntefli þar sem íslenska liðið var sterkara og seinni leikurinn í Þrándheimi endaði 1-1 þar sem Ísland var lengi vel með forystuna. Það er kominn tími á að vinna Noreg!

Það var smá hiti á fréttamannafundi Íslands í gær. Þorsteinn Halldórsson, landsliðsþjálfari Íslands, hefur síðustu daga verið spurður út í framtíð sína eftir vonbrigðin á Evrópumótinu. Þegar hann var spurður í enn eitt skiptið út í framtíð sína á fréttamannafundi fyrir leikinn gegn Noregi í gær þá sagðist hann ekki ætla að svara spurningunni daginn eftir leik. Sagðist hann í kjölfarið verulega ósáttur við það að leikmaður Íslands hefði fengið spurningu varðandi framtíð þjálfarateymisins eftir leikinn gegn Sviss. „Ég er mjög hreinskilinn maður og mér finnst fáránlegt að spyrja leikmann að því daginn eftir leik hvort að hann vilji þjálfarann áfram eða ekki. Mér finnst það heimskuleg spurning og mér finnst hún dónaleg gagnvart leikmanninum. Þið getið alveg spurt mig um þetta en að spyrja leikmann út í þetta finnst mér... ég veit ekki alveg hvaða orð ég á að nota," sagði Steini og notaði svo orðið „nautheimska."

Þrátt fyrir að vonbrigðin séu mikil þá er íslenski hópurinn staðráðinn í að vinna leikinn á morgun og enda mótið með stæl. Það mátti heyra strax á leikmönnum eftir leikinn gegn Sviss á dögunum sem tapaðist 2-0. „Við ætlum bara að fokking vinna Noreg. Ég nenni þeim ekki lengur. Við spilum fyrir stoltið og þá frábæru áhorfendur sem eru hérna og þeir eiga skilið að fá sigur," sagði miðvörðurinn Ingibjörg Sigurðardóttir eftir leikinn gegn Sviss og tóku fleiri leikmenn undir það.

Í dag eru 4376 dagar síðan íslenska kvennalandsliðið vann síðast leik á stórmóti og komst síðast upp úr riðlinum á Evrópumótinu. Ísland hefur aðeins einu sinni komist upp úr riðlinum á EM í fimm tilraunum en það gerðist síðast á EM 2013 þegar Dagný Brynjarsdóttir gerði sigurmarkið gegn Hollandi. Það var jafnframt eini sigurleikur kvennalandsliðsins á EM til þessa. Sá leikur var 17. júlí árið 2013.

Undirritaður tók upp hlaðvarp með Eddu Sif og Einari Erni á RÚV eftir vonbrigðin gegn Sviss. Hægt er að hlusta á það á öllum hlaðvarpsveitum og með því að smella á tengilinn hér fyrir neðan.

Þetta mót hefur verið mikil vonbrigði. Það er alveg ljóst. Við töpuðum gegn Finnlandi í fyrsta leik og svo gegn Sviss í leik tvö. Eftir tapið gegn Sviss varð það ljóst að við ættum ekki lengur möguleika á því að fara áfram. Noregur hins vegar hefur spilað illa og er búið að vinna báða leikina sína.

Þá er komið að síðasta leik Íslands á Evrópumótinu í Sviss. Hann er gegn Noregi og það væri gaman að vinna hann. Hægt verður að fylgjast með gangi mála í þessari textalýsingu.