Sædís Rún Heiðarsdóttir.
Sædís er á sínu fyrsta stórmóti með Íslandi.
„Þetta er virkilega fúlt og súrt. Ég get ekki sagt annað en það," sagði landsliðskonan Sædís Rún Heiðarsdóttir þegar hún var spurð út í tilfinninguna í gær að falla úr leik á EM.
Ísland hefur tapað báðum leikjum sínum á Evrópumótinu og á ekki lengur möguleika á því að komast áfram.
Ísland hefur tapað báðum leikjum sínum á Evrópumótinu og á ekki lengur möguleika á því að komast áfram.
„Maður er hálf daufur en þetta er bara staðreynd, eitthvað sem við verðum að sætta okkur við. Það er einn leikur eftir og við þurfum að fara í hann til að vinna."
Mikil vonbrigði að ná ekki yfirlýstum markmiðum sem sett voru fyrir mót?
„Já, algjörlega. Maður setur sér markmið til að ná þeim. Stundum falla hlutirnir ekki með þér og það var staðreyndin hjá okkur núna. Við þurfum að nota þetta sem spark í rassinn."
Liðið var komið seint heim á hótel eftir leikinn í gær og þær voru mættar á æfingu í hádeginu. „Ég get alveg staðfest það að ég svaf ekki mikið. Ætli maður reyni ekki að leggja sig eitthvað í dag og safna kröftum fyrir næsta leik. Maður þarf að reyna að leggja gærdaginn til hliðar þar sem það er stutt í næsta leik."
Fyrstu mínúturnar á stórmóti
Sædís hefur komið við sögu í báðum leikjunum til þessa; hennar fyrstu mínútur á stórmóti.
„Ég er virkilega stolt og þakklát að fá að vera hérna og taka þátt í þessu. Það er stórt fyrir mig og eitthvað sem mig hefur dreymt um ótrúlega lengi. Að ná því er jákvætt fyrir mig," sagði Sædís.
Stelpurnar mæta Noregi í lokaleik sínum á mótinu. Verður erfitt að gíra sig upp í það?
„Nei, það finnst mér ekki. Það er alltaf stórt að spila landsleik og hvað þá á stórmóti. Staðan er auðvitað öðruvísi en við höfðum vonast til. Við ætlum að fara inn í þann leik til að vinna, það er bara nýtt markmið," sagði bakvörðurinn efnilegi að lokum.
Athugasemdir
