Heimild: BBC 

Yfirvegun hans fyrir framan mark andstæðingana gerði hann að leikmanni sem gerði gæfumun í leikjum, fyrst undir Jurgen Klopp og síðan Arne Slot.

Þegar Liverpool keypti Jota sagði Klopp að hann væri leikmaður sem gæfi liðinu svo marga kosti og gæti bætt sig enn frekar. Hann væri með hraðann, góðar tengingar við samherja, gæti varist vel, gæti pressað. Jota kom með þetta allt og meira til.

Hann var í liði Liverpool sem vann FA-bikarinn og deildabikarinn 2022. Meiðsli áttu síðar eftir að hægja á tíð hans hjá Liverpool en hann var þó enn gulls ígildi á síðasta tímabili.

Hann skoraði jöfnunarmark sekúndum eftir að hafa komið inn af bekknum gegn Nottingham Forest í janúar og skoraði svo sigurmarkið í grannaslagnum gegn Everton í apríl. Hann var dýrkaður og dáður af stuðningsmönnum Liverpool.

Þegar hann kom af meiðslalistanum á síðasta tímabili lét hann til sín taka og var oftar en ekki réttur maður á réttum stað. Skiljanlega var það Mohamed Salah sem hirti fyrirsagnirnar en mörkin hjá Jota gerðu oft gæfumun og varnir andstæðingana voru alltaf hræddar við hann.

Jota hóf atvinnumannaferil sinn hjá Pacos de Ferreira áður en hann hélt til Atletico Madrid 2016. Tímabilið 2016-17 var hann á láni hjá Porto þar sem bróðir hans, Andre Silva, sem einnig lést í bílslysinu var leikmaður í unglingaliði félagsins.

Jota sló svo í gegn í enska boltanum og skoraði 44 mörk í 131 leik hjá Wolverhampton áður en hann skipti yfir til Liverpool. Hjá Liverpool skoraði hann 21 mark í 55 leikjum tímabilið 2021-22 og alls 65 mörk í 182 leikjum fyrir félagið.

Jota var vinsæll meðal liðsfélaga og stuðningsmanna og með landsliðinu vann hann Þjóðadeildina tvisvar.