„Mér fannst ég sjá framfarir. Maður er ekki alltaf alveg fullkomlega ánægður, það eru alltaf litlir hlutir sem hægt er að bæta. Það eru nokkrir hlutir sem ég er ánægður með, komandi á svona erfiðan útivöll hvernig við stjórnuðum ákveðnum aðstæðum. Bæði pressuna þeirra og hvernig við náðum að breyta pressunni okkar eftir að við komumst að því hvernig byrjunarliðið þeirra var," sagði Arnar Gunnlaugsson, landsliðsþjálfari Íslands, eftir sigur á Skotum í æfingaleik í Skotlandi í kvöld.
„Það var mikið af sendingarfeilum frá góðum leikmönnum sem klikkaði alltof mikið fyrir minn smekk. Hjartað og baráttan var til fyrirmyndar, við verðum að fara hætta hugsa um okkur sem litla liðið sem getur ekki spilað fótbolta. Við sýndum það á köflum og sýndum það sérstaklega í fyrri leiknum gegn Kósovó að við getum spilað góðan fótbolta," sagði Arnar.
Andri Lucas Guðjohnsen kom íslenska liðinu yfir snemma leiks.
„Aðdragandinn af því var virkilega ánægjulegur. Þetta var frábær pressa, það er ekki oft sem maður sér það á sterkum útivelli að íslenska liðið þori að stíga upp og pressa rétt. Svo vinnum við seinni boltann og svo er þetta hrikalega vel klárað með vinstri löpp hjá Andra Lucasi, fylgdi þar í fótspor pabba síns sem skoraði held ég á sama velli fyrir einhverjum 20 árum síðan," sagði Arnar.
Íslenska liðið þaggaði niður í stuðningsmönnum Skotlands strax í upphafi og þeir vöknuðu aldrei til lífsins og bauluðu á sína menn í lokin.
„Trixið þegar þú ferð á svona erfiða útivelli er að gera stuðningsmenn hljóðláta strax frá byrjun. Það var augljóst að við vorum með sjálfstraust til að spila strax frá byrjun. Stuðningsmenn létu vel í sér heyra í þjóðsöngnum og svo allt í einu þagnaði skoski hlutinn sem er mjög gott á svona útivelli. Í seinni hálfleik náðu Skotarnir ekki að gera neitt til að láta stuðningsmennina gleðjast og fá adrenalín sem kannski myndi hræða okkar stráka. Það var fagmannlega gert og þroskamerki hvernig við höndluðum það," sagði Arnar.
Athugasemdir
