Arsenal hefur skráð sig í baráttuna um William Gomes, kantmann Porto í Portúgal.
Gomes er tvítugur Brasilíumaður sem átti stórkostlegt tímabil með Porto, sem varð deildarmeistari í ár.
Hann skoraði 13 mörk og gaf tvær stoðsendingar í deildinni en hann er á óskalista margra stórliða fyrir sumarið.
Atlético Madríd og Manchester United hafa fylgst með Gomes, sem er með 80 milljóna evra riftunarákvæði í samningnum, og segir Globo Esporte nú að Englandsmeistarar Arsenal séu komnir í baráttuna.
Porto vill alls ekki missa Gomes en er þó reiðubúið að ganga að samningaborðinu ef félög eru tilbúin að greiða upphæð sem kemst í námunda við riftunarákvæðið.
