Spánn: Real Madrid færist nær Barcelona - Mbappe kominn með ellefu mörk

Real Madrid tókst að saxa á forystu Barcelona í toppbaráttunni í La Liga á Spáni í kvöld.

Madrídingar unnu nokkuð þægilegan og öruggan 3-0 sigur á Girona.

Jude Bellingham varð fyrstur allra í deildinni til að skora fimm leiki í röð á þessu tímabili er hann þrumaði boltanum af krafti í markið úr miðjum teignum.

Snemma í síðari hálfleik klúðraði franski sóknarmaðurinn Kylian Mbappe algeru dauðafæri er hann stal boltanum á miðjunni, komst einn á móti marki en setti boltann framhjá. Markvörðurinn var þegar farinn í hitt hornið en samt tókst honum að klúðra færinu. Sem betur fer fyrir Mbappe hefði markið hvort er ekki staðið þar sem hann handlék boltann í aðdragandanum.

Tyrkneska undrabarnið Arda Güler bætti við öðru marki Madrídarliðsins á 55. mínútu áður en Mbappe skoraði ellefta mark sitt á tímabilinu.

Hann fékk boltann hægra megin á vellinum, hljóp inn í teiginn og skoraði úr þröngu færi. Þó hann sé ekki endilega upp á sitt besta á fyrsta tímabili sínu með Real Madrid er hann samt að ná að skora.

Í dag hjálpaði hann liði sínu að vinna góðan sigur og er Real Madrid nú með 36 stig, tveimur á eftir Barcelona.