Ég hef reynt ýmislegt á mínum ferli en þetta mót, hvernig það spilaðist hjá okkur, var alveg ótrúlega sérstakt.
Það er efni í heila bíómynd það sem hann lætur stundum út úr sér á æfingum
Hann og Óli Brynjólfs eru ótrúlega gott teymi saman og lögðu hlutina mjög vel upp.
Football is a game of opinion
Það sem klikkaði fyrst og síðast hjá okkur í sumar var að nokkrir lykilmenn stóðu ekki undir nafni, ég þar á meðal.
Það lá ansi þungt á manni á tímapunkti.
Ég hef gagnrýnt stjórnina á opinberum vettvangi sem hefur þótt frekar umdeilt.
Ég geri mér alveg grein fyrir því að ég er fyrirmynd fyrir yngri iðkendur og slíkt.
Fyrri hluti viðtalsins við Gunnar Þorsteinsson var birtur í gær. Þar ræddi hann um námið í Columbia háskólanum, umsóknarferlið og ákvörðunina að ýta fótboltanum til hliðar - ótímabundið.
Í þessum hluta ræðir Gunnar um síðasta sumar með Grindavík og var auk þess spurður út í gagnrýni út í stjórn Grindavíkur. Gunnar sagði þá frá hans sýn á afreksstarf hjá íslenskum félögum.
Fyrri hluti:
„Finnst að mín köllun sé að ljúka fótboltakaflanum í bili"
Í þessum hluta ræðir Gunnar um síðasta sumar með Grindavík og var auk þess spurður út í gagnrýni út í stjórn Grindavíkur. Gunnar sagði þá frá hans sýn á afreksstarf hjá íslenskum félögum.
Fyrri hluti:
„Finnst að mín köllun sé að ljúka fótboltakaflanum í bili"
„Eina sem mér finnst leiðinlegt við þetta er að við í Grindavík fórum ekki upp. Það hefði verið skemmtilegra að skilja við þetta á skemmtilegri nótum. Síðastliðin fimm ár hafa verið mjög góð, svo að maður horfi frekar á bókina í heild frekar en síðasta kaflann," sagði Gunnar í fyrri hluta viðtalsins.
Hvernig upplifðirðu tímabilið með Grindavík og kannski sérstaklega það sem virtist vera mótlæti hjá ykkur undir lok leikja snemma í mótinu?
„Ég hef reynt ýmislegt á mínum ferli en þetta mót, hvernig það spilaðist hjá okkur, var alveg ótrúlega sérstakt. Þetta mót snerist minna um knattspyrnulega getu og svoleiðis, frekar að menn næðu að halda dampi og halda einbeitingu í gegnum þetta (frestanir á mótinu vegna heimsfaraldursins). Einhverja hluta vegna þá hafði þetta einhvern veginn verri áhrif á okkur heldur en lið sem tókst að nýta þetta til að styrkjast, eins og virðist hafa gerst hjá Keflavík.“
Eitthvað var rætt um líkamlegt ástand leikmanna hjá Grindavík.
„Eðlilega þegar þú glutrar niður forskoti undir lok leikja vakna svoleiðis spurningar. Það var talað um eitthvað hlaupapróf hjá okkur en það var alls ekki málið. Menn komu merkilega vel út úr slíku prófi. Þetta var algjörlega sálfræðilegt. Það er erfitt að finna einhvern einn sökudólg. Mögulega var þetta af því við náðum ekki að vinna nógu lengi í taktík sem sýnir sig í því að við urðum þéttari þegar leið á mótið."
„Svo kemst svona inn í hausinn á mönnum. Tökum dæmi hjá United undir stjórn Sir Alex. Trekk í trekk var liðið undir en náði að vinna undir lok leikja. Alveg eins getur það gerst þveröfugt að þú ferð í baklás. Við vorum ekki með reynslulítið lið, Vladan og Zeba sem dæmi þrautreyndir atvinnumenn, ég, Aron, Sindri, Gummi Magg og Alex Veigar. Allir höfum við verið mjög lengi í boltanum og mikil reynsla úr þessari deild. Þetta var ótrúlega skrítið. Við töpuðum tvisvar niður tveggja marka forskoti á móti Magna og Leikni Fásk, með fullri virðingu, það voru lið sem áttu erfitt uppdráttar.“
„Það er ekkert launungarmál að rekstur félagsins hafi gengið upp og ofan. Tvisvar sinnum skipt um þjálfara á tveimur árum en í sumar var allt nákvæmlega eins og það átti að vera, fjárhagur félagsins, þjálfararnir, hópurinn mjög þéttur og það voru færri útlendingar. Útlendingar eru ekki vandamál, oft á tíðum miklu betri í fótbolta en Íslendingarnir, en það getur verið erfitt í mjög fjölþjóðlegum hópi, þar sem leikmenn koma alls staðar að, að hafa hópinn þéttan og finna sameiginlegan kyndil sem allir bera. Í sumar var rosalega mikill meðbyr og alveg augljóst hvert allir stefndu. Við áttum að fara upp ef horft er í spá og pappírana.“
„Mótið var mjög óhefðbundið og ég hef velt því fyrir mér með liðin sem gekk mjög vel: Keflavík, Leikni R. og Fram. Þau voru ekki beint mjög óreynd en voru með aðeins yngri leikmannahópa og ég pældi í því hvort að leikmennirnir hafi höndlað það betur að ´stoppa og byrja‘ mótið oftar en einu sinni. Það fór illa með skrokkinn á einhverjum hjá okkur, það er ekki það sama að vera í fótbolta og vera að hreyfa sig. Svo kannski voru menn aðeins sveigjanlegri hjá þessum liðum."
„Íþróttasálfræðingur sagði við mig á sínum tíma að hann vildi helst ekki fá eldri einstaklinga heldur en tvítuga því þú verður oft fullmótaður á næstu árum á eftir. Það verður oft erfiðara að bregða út af vananum, ert orðinn fastmótaður með þína ávana og menn eru vanir því að í mars er farið í æfingaferð og eftir hana er æft á grasi. Það er þessi taktur sem menn hafa verið í 5-10 ár og ég velti því fyrir mér hvort menn hafi ekki höndlað það nógu vel.“
„Ég segi þetta því það sem klikkaði fyrst og síðast hjá okkur í sumar var að nokkrir lykilmenn stóðu ekki undir nafni, ég þar á meðal. Á endanum voru það þrír ungir leikmenn sem voru kosnir bestir, Sigurjón, Siggi og Oddur. Þeir voru bestir hjá okkur og rennir stoðum undir þá tilgátu að eldri leikmenn hafi ekki höndlað þetta alveg jafn vel. En eins og tjallinn segir: ´football is a game of opinion‘ – þetta er svona mín pæling, það lá ansi þungt á manni á tímapunkti. Það var svo of seint í seinni hlutanum þegar við réttum úr kútnum. Ég læt svoleiðis móðan mása þegar einhver nennir að spyrja mig út í þetta,“ sagði Gunnar og hló þegar hann lauk svari sínu.
Hvernig var samtalið við Bjössa (Sigurbjörn Hreiðarsson) þjálfara og aðra hjá félaginu þegar þú tjáðir þeim að þú værir að fara í þessa ótímabundna hlé frá boltanum – var þetta auðvelt?
„Ég lét þá alla vita um leið og ég komst inn, sem var í febrúar, fyrir tímabilið - ég var að renna út á samningi.“-
„Bjössi er náttúrulega mjög fyrirferðamikill í umræðunni, eðlilega, það eru fáir sem er jafn skemmtilegt að hlusta á. Ræðurnar hans fyrir æfingar hjá honum, það er efni í heila bíómynd það sem hann lætur stundum út úr sér á æfingum. Eina vandamálið við það er að yngri leikmenn þeir skilja ekki orð af því sem hann segir því orðaforðinn er mjög fjölskrúðugur. Það hefur oft hálf upphitunin farið í að útskýra fyrir þeim hvað Bjössi var að segja.“
-„Hann og Óli Brynjólfs eru ótrúlega gott teymi saman og lögðu hlutina mjög vel upp. Óli býr yfir stóískri ró og lærði sjálfur í Bandaríkjunum einmitt. Þeir sýndu þessu strax skilning og ég útskýrði þetta fyrir þeim eins og ég hef gert hér. Þetta var aldrei neitt mál eða nein kergja af þeirra hálfu. Þeir spurðu hvort ég gæti eitthvað spilað en ég hef engin tök á því, kem ekkert heim um sumarið. Allt fór fram með vinsemd og virðingu.“
Gunnar hélt áfram og kom inn á samskipti sín og gagnrýni í garð stjórnar Grindavíkur í gegnum tíðina.
„Ég held að þetta sé ljúfsárast fyrir stjórnina. Ég er búinn að vera fastur póstur í tilverunni hér en er kominn af miklum skörungum og læt skoðun mína í ljós af vandlega yfirlögðu ráði. Ég hef gagnrýnt stjórnina á opinberum vettvangi sem hefur þótt frekar umdeilt."
„Það eru allir vinir í dag og núna er haldið frábærlega utan um hlutina hjá félaginu. Allt í plús hjá félaginu og eignaðist það t.a.m. sína fyrstu Íslandsmeistara í karlaflokki í sumar. Það má að miklu leyti skrifað á að það var tekin miklu fastari tökum afreksstefnan innan félagsins. Ég einmitt tjáði mig um það á opinberum vettvangi í sumar og þá logaði allt innan félagsins.“
Gunnar hefur miklar skoðanir á afreksstefnum íslenskra félaga.
„Starfsemi íslenskra íþróttafélaga er tvíþætt. Annars vegar að kenna gömlu góðu gildin sem íþróttirnar koma með, skipulag, vera hluti af liði, agi og fleira sem fólk tekur með sér úr íþróttum. Margir framamenn í þjóðfélaginu eru gamalt íþróttafólk, alveg ótrúlegur fjöldi. Hitt hlutverk íþróttafélaga er afreksstarfið. Þetta er mjög umdeilt og svolítið tabú að ræða þetta, ég fer ekki of djúpt í þetta hér."
„Ég skrifaði langan pistil um þetta í sumar á Facebook og það urðu skiptir skoðanir á því hvernig málum væri háttað. Svoleiðis gerist með allt og það verður að vera hægt að ræða hlutina. Við búum í þannig þjóðfélagi að ef einhver segir skoðun sem fer ekki eftir áliti meirihlutans þá dettum við oft í að ´cancel-a´ þeirri skoðun. Afreksstarf íþróttafélaga sem líka er með æskulýðsstarf gengur á móti þessari sósíalísku hugsun sem er í gangi á Íslandi. Ég er sósíalískur í gegn en það er alltaf talað um að íþróttafélög séu flaggskip bæjarins, eins t.d. í Vestmannaeyjum. ÍBV hefur unnið titla í karla- og kvennaflokki í fótboltanum á undanförnum árum og verið með mjög gott lið í handbolta."
„Punkturinn minn er sá að til að ná árangri til lengri tíma þarf stöðugleika. Til að ná stöðugleika þarftu að vera með heimamenn því þeir eru lengur hjá félaginu. Stuðningsmenn vilja sjá heimamenn spila. En hvernig heldur fólk að það gerist? Það gerist ekki með því að vera í kúri, kúri, klapp, klapp á æfingum. Þú þarft að vera með markvisst afreksstarf og við gerum ekki nóg af því á Íslandi. Íslenska deildin er komin í ruslflokk hjá UEFA, örfáar deildir fyrir neðan okkur. Við eigum marga leikmenn erlendis, ég geri mér grein fyrir því, en við þurfum að þora ræða afreksstefnuna og mér finnst mjög jákvætt að KSÍ hafi tekið inn Arnar Þór Viðarsson í þessi mál."
„Mér finnst frábært að Grindavík hafi þorað að taka þetta skref. Það eru margir annmarkar á starfinu hjá félaginu, lengi getur gott batnað, en ég er ánægður að þrátt fyrir að þessu hafi verið talsvert mótmælt í bæjarfélaginu hafi stjórn og unglingaráð hjá félaginu staðið keik. Þau meðtóku gagnrýnina og lagfærðu það sem þurfti að lagfæra. Félagið stendur sterkara fyrir vikið.“
Þín rödd virðist hafa haft áhrif í þessum efnum. Ertu sáttur með það?
„Ég vil að það komi fram að ég tjái mig ekki um sérstaka hluti, sem mér finnst skipta máli og veit að eru viðkvæmir, nema af vandlega yfirlögðu ráði. Maður á alltaf að hugsa áður en maður talar. Jújú, ég geri mér alveg grein fyrir því að orð bera ábyrgð og hafandi verið fyrirliði - ég geri mér alveg grein fyrir því að ég er fyrirmynd fyrir yngri iðkendur og slíkt."
„Ég geri mér samt grein fyrir því að ég er nú bara fyrirliði 1. deildarliðs Grindavíkur á Íslandi, það er engin alvöru vigt sem maður dregur. Ég er þannig úr garði gerður og þannig upp alinn að maður á að segja sína skoðun og berjast fyrir því sem maður telur vera réttlátt,“ sagði Gunnar.
Fyrri hluti:
„Finnst að mín köllun sé að ljúka fótboltakaflanum í bili"
Athugasemdir
