Björn Daníel.
Frans Elvarsson.
Björn Daníel Sverrisson var í síðasta mánuði tilkynntur sem nýr þjálfari Sindra í 3. deildinni. Kona Björns Daníels, Lukka Óðinsdóttir, er frá Höfn og hefur hann varið talsverðum tíma þar síðustu ár.
Frans Elvarsson, leikmaður Keflavíkur, er uppalinn hjá Sindra og hann var spurður út í tíðindin og hvaða þýðingu þetta hefði fyrir Sindra.
Frans Elvarsson, leikmaður Keflavíkur, er uppalinn hjá Sindra og hann var spurður út í tíðindin og hvaða þýðingu þetta hefði fyrir Sindra.
„Mér finnst geggjað að fá Bjössa á fallegasta stað Íslands, að stýra mínum uppeldisklúbb. Ég veit líka að mínir menn á Höfn eiga eftir að ná honum út á Sindravöll í takkaskóm þegar grasið þar fer aðeins að grænka," segir Frans.
„Þetta gæti verið lyftistöng fyrir samfélagið á Höfn að fá svona stóran prófíl og veit að hann fær stuðning til að búa til gott lið. Ég ólst upp við það þegar Ármann Smári Björnsson var 'target striker' og raðaði inn mörkum og Hajrudin Cardaklija stóð í markinu. Það gefur ungum iðkendum blóð á tennurnar að eiga flottan meistaraflokk að líta upp til."
„Ég man ég var heima hjá Denis, syni Hajrudin Cardaklija, að fylgjast með úrslitum á textavarpinu hvort að Sindri hefði komist upp í næst efstu deild. Denis var grenjandi úr spennu og svo loksins þegar úrslitin voru staðfest fögnuðum við ógurlega og mamma hans Denisar lagðist á grúfu í gólfið í einhverju spennufalli. Þetta er skemmtileg minning að eiga og ég held að það sé vettvangur fyrir Sindra, eins og önnur lið á landsbyggðinni hafa sýnt, að það getur verið stemming að búa til lið sem nær miklum árangri og búa til minningar fyrir unga sem aldna í bæjarfélaginu," segir Frans sem hélt til Njarðvíkur eftir tímabilið 2006 með Sindra.
Athugasemdir
