„Ógeðslega sætt," sagði Nökkvi Þeyr Þórisson maður leiksins í 3-0 sigri KA gegn Ægi í 8 liða úrslitum Mjólkurbikarsins í kvöld.
Lestu um leikinn: KA 3 - 0 Ægir
„Eina markmiðið var að vinna þennan leik og komast í undanúrslit. Þetta var erfið fæðing en hófst á endanum og ég er virkilega sáttur með að vera kominn áfram,"
Nökkvi segir að honum hafi fundist KA liðið mæta með hangandi haus inn í leikinn.
„Mér leið eins og menn hafi haldið að þeir gætu bara tekið þetta á töffaratempóinu og voru að tapa boltanum oft asnalega og héldu að við þurftum ekki að gefa okkur alla í þetta til að vinna, það sýndi sig að þeir voru ógeðslega fastir fyrir og í góðu standi. Við þurftum virkilega að reyna á okkur til að brjóta þá niður, það skilaði sér á endanum," sagði Nökkvi Þeyr og bætti við;
„Þegar við skiptum úr þessu töffaratempói yfir í að gefa okkur alla fram þá loksins opnaðist þetta og við brutum ísinn."
