Nadía í leik með Víkingi síðasta sumar.
Víkingur Reykjavík hefur framlengt við tvo af lykilmönnum sínum en um er að ræða Nadíu Atladóttur og Dagnýju Rún Pétursdóttur.
Nadía, sem er fædd árið 1999, lék upp yngri flokkana með Víking og lék sinn fyrsta leik í meistaraflokki með Haukum árið 2015. Nadía spilaði síðast með Fjölni áður en hún sneri aftur heim í Víking fyrir tímabilið 2020.
Nadía lék alla 17 leiki liðsins í Lengjudeildinni á síðasta ári, tvo leiki í Mjólkurbikarnum og skoraði tíu mörk. Hún á að baki 64 leiki og 19 mörk í meistaraflokki og er ein af reynslumestu leikmönnunum í ungu og efnilegu liði Víkings. Nadía var útnefnd besti leikmaður meistaraflokks kvenna eftir síðasta tímabil. Þá var hún kosin knattspyrnumaður Víkings og tilnefnd af knattspyrnudeild í kjöri á vali á íþróttamanni Víkings árið 2020.
Dagný Rún, sem er fædd árið 2003, lék upp yngri flokka með HK. Hún byrjaði meistaraflokks ferilinn með HK/Víking í Pepsi Max deild kvenna árið 2019, þá aðeins 16 ára gömul. Dagný spilaði 16 leiki með liði Víkings í Lengjudeildinni síðasta sumar og skoraði í þeim þrjú mörk. Þrátt fyrir ungan aldur þá er Dagný einn af lykilleikmönnum liðsins og gríðarlega mikilvæg fyrir liðsheildina og þá metnaðarfullu uppbyggingu sem liðið er í.
„Stjórn knattspyrnudeildar lýsir yfir mikilli ánægju með að hafa framlengt samningana við þessa lykilleikmenn liðsins," segir í tilkynningu Víkinga.
Athugasemdir
