Brynjar Björn Gunnarsson, þjálfari Leiknis
Brynjar Björn Gunnarsson, þjálfari Leiknis, var svekktur eftir 1-0 tapið gegn Vestra í 32-liða úrslitum Mjólkurbikarsins á Kerecis-vellinum á Ísafirði í dag.
Lestu um leikinn: Vestri 1 - 0 Leiknir R.
Þjálfarinn var nokkuð sáttur með frammistöðu sinna manna, en segir það hafi verið svekkjandi að tapa á þann hátt sem liðið gerði með klaufalegum mistökum undir lok leiks.
„Svekkjandi að tapa á svona marki eins og við töpuðum á. Heilt yfir var Vestri örlítið sterkari aðilinn en á færum held ég að þetta hafi verið nokkuð jafnt. Þeir fá færi og við fáum færi svo skora þeir úr svona mistökum sem við gerum úr okkar teig. Það er svekkjandi,“ sagði Brynjar við Fótbolta.net.
Markið kom fjórum mínútum fyrir lok venjulegs leiktíma þegar Leiknismenn voru komnir á ágætis ról í leiknum.
„Jú sérstaklega í ljósi þess að mér fannst við komast meira inn í leikinn síðustu tuttugu mínúturnar og vorum aðeins meira með boltann og komast upp völlinn. Við fengum alveg okkar tækifæri til þess að skora mark en auðvitað það endað 0-0 og farið í framlengingu sem hefði verið fínt og við hefðum séð hvað hefði gerst þar.“
„Við vorum kannski smá ryðgaðir í dag og höfum ekki spilað leik í 2-3 vikur. Við tókum leik við Smára í bikarnum sem var snjóað eiginlega frá okkur og síðan var frestað þessum leiki síðustu helgi yfir á þessa helgi núna. Það var örlítið ryð í okkur og síðan má horfa framhjá því, það er ferðalag og menn fóru snemma af stað í morgun. Mér fannst leikurinn heilt yfir miðað við allt og líka alls staðar á vellinum fannst mér frammistaðan ágæt hjá okkar liði en hefðum getað verið betri með boltann í þeim stöðum sem við sköpum okkur í og í kringum teig Vestra,“ sagði hann ennfremur en viðtalið má sjá í heild sinni hér fyrir ofan.
