Víðir Reynisson öryggisstjóri skarst í leikinn og reif Jóhann Berg í burtu þegar hann fór að rífast við Paul Pogba.
„Þegar þú ert kominn 2-0 yfir á móti heimsmeisturunum þá viltu klára leikinn. En þegar við lítum til baka eftir nokkra daga eigum við eftir að horfa á fullt af jákvæðum punktum, sérstaklega eftir síðustu tvo leiki. Þetta var klárlega skref fram á við," sagði Jóhann Berg Guðmundsson eftir 2-2 jafntefli Íslands við Heimsmeistara Frakka í Guingamp í kvöld.
Lestu um leikinn: Frakkland 2 - 2 Ísland
Ísland skoraði tvö mörk í leiknum, átti fleiri færi og var hættulegt í föstum leikatriðum. Spilaði semsagt eins og landsliðið sem við eigum að þekkja annað en í tapleikjunum í september.
„Þetta var eins og í gamla daga, síðustu tveir leikir voru erfiðir en það var nýr þjálfari með nýjar áherslur. Það tekur alltaf tíma hjá öllum liðum, við fengum skell á móti Sviss en vorum töluvert betri á móti Belgíu og enn betri í dag. Þetta er allt í rétta átt og frábært að fá Sviss aftur á mánudaginn. Vonandi getum við náð í góð úrslit þar."
Allt sauð uppúr í lok leiksins þegar Rúnar Már Sigurjónsson tæklaði Mbappe sem var á mikilli ferð í átt að marki Íslands. Jóhann Berg blandaði sér í lætin.
„Ég sá bara Rúnar aleinan með allan franska bekkinn yfir sér, ég ákvað því að fara og hjálpa honum. Ég sá að Pogba hélt í hann og reif í hendina á honum og sagði honum að sleppa honum. Ég er bara mættur til að passa liðsfélagana og passa að það sé ekkert vesen."
Þetta hefði endað illa fyrir frakkana hefðiru hleypt mèr í þá 😂 https://t.co/gcoWbUwINV
— Johann B Gudmundsson (@Gudmundsson7) October 11, 2018
Athugasemdir