Kristján Guðmundsson.
Kristján spáir því að Hallgrímur verði hægri bakvörður.
Kristján Guðmundsson, þjálfari Keflavíkur, skoðaði komandi landsleik gegn Króatíu í útvarpsþætti Fótbolta.net á laugardaginn. Í spilaranum hér að ofan má hlusta á spjallið við hann í heild sinni.
„Það er alveg eðlilegt að þeir velji nánast óbreyttan hóp. Menn vita alveg að hverju þeir ganga og það er alveg eðlilegt að þessi hópur sé valinn," segir Kristján um valið á leikmannahópnum.
Hljóp á eftir rjúpum sem krakki
Kristján býst við nánast sama byrjunarliði og í undanförnum leikjum en stærsta spurningamerkið er hver verði hægri bakvörður þar sem Birkir Már Sævarsson er í banni í fyrri leiknum.
„Þeir hafa væntanlega skoðað hvaða hægri bakverðir eru að spila í liðunum. Það er bara einn Íslendingur út í heimi sem er að spila sem hægri bakvörður og það er Birkir Már sem er í leikbanni í fyrri leiknum. Þá þarf að finna einhvern annan leikmann til að taka þá stöðu á föstudaginn."
„Það verður leikmaður sem hefur eitthvað spilað sem hægri bakvörður fyrir landsliðið sem spilar á föstudaginn. Mín tilfinning er að Hallgrímur Jónasson taki stöðuna, Ólafur Ingi Skúlason þar á eftir og jafnvel Guðlaugur Victor Pálsson."
„Hallgrímur er gríðarlega öflugur í föstum leikatriðum, bæði varnar og sóknar. Hann getur skilað flestum stöðum mjög vel og skorað töluvert af mörkum. Hann getur hlaupið endalaust, hann var settur í það sem barn af föður sínum að hlaupa eftir rjúpum."
„Svo er spurning hvernig þeir leggja þetta upp. Hvað eru Króatarnir að gera á sínum vinstri kanti og hvaða eiginleika þurfum við inn á völlinn í þessari stöðu? Það er aðalatriðið þegar þeir velja bakvörðinn."
Jóhann Laxdal var ekki valinn í hópinn en hann fór út og æfði með Rosenborg til að reyna að auka líkurnar á því að vera valinn.
„Jói hefur ekki verið að spila en þetta var mjög metnaðarfullt. Það sýndi bara þann metnað sem hann hefur fyrir fótboltanum. Það kom ekki á óvart að hann hafi ekki verið valinn en hann sýndi frábæran karakter," segir Kristján.
Þarf að passa Modric
„Bæði þessi lið hafa verið að fá mörk á sig og ég hef fulla trú á því að við skorum. Lykilatriðið er að vinna. Ég er bjartsýnn á heimaleikinn. Við getum alltaf skorað á útivelli úr föstu leikatriði eða hverju sem er," segir Kristján sem hefur kynnt sér króatíska liðið.
„Varnarleikur Króata á þessu ári hefur verið mjög slakur. Luka Modric er maðurinn sem þarf að passa. Hann er að kveikja í sóknarmönnum Króata og það þarf að loka á sendingaleiðirnar hjá honum. Þeir eru með mjög duglegan senter í Mario Mandzukic. Þeir halda boltanum vel en þegar þeir missa hann eru þeir ekkert sérstakir í að vera snöggir til baka og verjast. Þetta einvígi gæti ráðist á því hvort liðið sé betra að snúa vörn í sókn."
„Mín tilfinning er sú þegar ég les viðtöl við Niko Kovac (þjálfara) að þó hann sé að tala ágætlega um okkar lið finnst mér undirtónninn vera sá að hann sé viss um að þeir komist í gegnum þetta. Þeir munu koma til með að halda boltanum vel en varnarleikurinn og samstilling fjögurra efstustu er vandamálið hjá þeim. Þeir hafa ekki mikinn tíma til að undirbúa sig og breyta það miklu frá síðustu leikjum. Það er kannski fyrst og fremst hugarfarið sem þarf að breyta."
Athugasemdir
