Claudio Ranieri, þjálfari Sampdoria á Ítalíu, segir að Fabio Quagliarella sé ekki á leið frá félaginu í þessum glugga en hann hefur verið orðaður við Juventus undanfarna daga.
Juventus þarf sóknarmann í þessum glugga en bæði Alvaro Morata og Paulo Dybala eru að glíma við meiðsli.
Gianluca Scamacca, leikmaður Genoa, er sagður í viðræðum við Juventus en Quagliarella hefur einnig verið orðaður við félagið.
Þessi 37 ára gamli framhejri er með 7 mörk í 15 leikjum fyrir Sampdoria og hefur verið einn öflugasti markaskorari deildarinnar síðustu ár.
Hann byrjaði á bekknum í 2-1 tapinu gegn Spezia í gær en Ranieri segir að Quagliarella sé ekki á förum.
„Mér þykir það leitt en stundum þarf ég að hafa hann á bekknum. Hann er okkar helsti markaskorari og leiðtogi liðsins en í sumum leikjum þurfum við að spila öðruvísi taktík og það er taktík sem hentar honum ekki," sagði Ranieri.
„Það er ekkert að fara gerast þó ég spili honum ekki í sumum leikjum," sagði hann í lokin.
Athugasemdir