England: Brighton fór illa með nýliðana - Dunk með eitt flottasta mark ársins

Lærisveinar Frank Lampard í Coventry hafa byrjað tímabilið hörmulega en liðið tapaði fjórða leik sínum í röð þegar Brighton kom í heimsókn á Coventry Building Society-leikvanginn í dag.

Brighton byrjaði líflega en heimamenn tóku við sér þegar leið á fyrri hálfleikinn og voru um tíma líklegri til að skora.

Bart Verbruggen átti tvær stórbrotnar markvörslur á skömmum tíma. Fyrst fékk Jack Rudoni frábæra fyrirgjöf inn á teiginn hægra megin og stýrði boltanum í átt að fjærhorninu, en Verbruggen bauð upp á heimsklassavörslu.

Skömmu síðar átti Frank Onyeka hörkuskot fyrir utan teig sem Verbruggen blakaði yfir markið.

Brighton hristi þetta af sér og komst yfir á 36. mínútu eftir stórkostlegt einstaklingsframtak Grikkjans Charalampos Kostoulas. Hann fékk boltann inn á teignum, skallaði hann yfir varnarmann og kláraði síðan snyrtilega í fjærhornið. Frábært mark hjá Kostoulas.

Snemma í síðari hálfleik bætti Malick Yalcouye við öðru marki þegar hann slapp í gegn vinstra megin og renndi boltanum auðveldlega framhjá Carl Rushworth.

Coventry-menn misstu hausinn í kjölfarið. Taiwo Awoniyi sá rauða spjaldið fyrir að gefa Max De Cuyper olnbogaskot og sextán mínútum síðar kom þriðja mark Brighton.

Bobby Thomas braut á Kostoulas innan teigs og Pascal Gross skoraði örugglega úr vítinu framhjá Rushworth sem hreyfði sig varla á línunni.

Lewis Dunk, varnarmaður Brighton, skoraði eitt af mörkum tímabilsins á 83. mínútu leiksins. Hann fékk boltann fyrir utan teiginn og smellti honum rakleiðis í samskeytin vinstra megin. Þetta var líklega flottasta mark sem hann hefur skorað á löngum ferli sínum.

Yasin Ayari gerði fimmta og síðasta mark gestanna með frábæru skoti fyrir utan teig og niðri í hægra hornið.

Þetta var kirsuberið á rjómann. Frábær frammistaða hjá Brighton í síðari hálfleiknum sem kom sér upp í 4. sæti deildarinnar með 7 stig en Coventry límt við botninn, án stiga og ekki enn skorað mark.