Bruce og Lingard bestir í apríl

Steve Bruce hjá Newcastle hefur verið valinn stjóri aprílmánaðar í ensku úrvalsdeildinni.

Bruce krækti í átta stig úr fjórum leikjum í apríl og Newcastle hefur nú tryggt áframhaldandi veru í ensku úrvalsdeildinni.

„Í mínum huga er þetta viðurkenning fyrir leikmenn mína og starfslið. Þeir hafa lagt á sig ótrúlega vinnu og án þeirra færu þessi verðlaun ekki í mínar hendur. Ég er hæstánægður og vil þakka þeim," segir Bruce.

Þá hefur Jesse Lingard, leikmaður West Ham, verið valinn leikmaður mánaðarins. Hann skoraði fjögur mörk og átti stoðsendingu í fjórum leikjum í apríl en hann er lánsmaður frá Manchester United.

„Ég tel að ég sé í besta formi lífs míns og þetta er í fyrsta sinn á ferlinum sem ég hlýt þessa viðurkenningu. Ég hef verið að vinna í því að fá meiri stöðugleika í minn leik og það hefur gengið vel," segir Lingard.