„Að byrja Rice er áhætta sem Tuchel þarf ekki að taka“

Enskir fjölmiðlar segja stefna í að miðjumaðurinn Declan Rice verði klár í að byrja fyrir enska landsliðið í undanúrslitaleiknum gegn Argentínu annað kvöld. Rice var tekinn af velli í hálfleik í sigrinum gegn Noregi í 8-liða úrslitum og svo kom í ljós að hann hafði verið rúmliggjandi og veikur í aðdraganda leiksins.

Guardian segir að Rice líði mun betur og verði væntanleg við hlið Elliot Anderson á miðsvæðinu gegn ríkjandi heimsmeisturum.

Andy Dunn, íþróttafréttamaður Mirror, skrifar skoðanapistil þar sem hann setur spurningamerki við það hvort það sé rétt að byrja með Rice. Hann talar um það gríðarlega leikjaálag sem hefur verið á þessum frábæra miðjumanni Arsenal og veltir því fyrir sér hvort hann hafi „lent á vegg“.

„Ef hann er ekki búinn að jafna sig að fullu ætti hann ekki að byrja leikinn. Rice var ekki líkur sjálfum sér gegn Noregi og enska liðið varð betra eftir að hann fór af velli. Það yrði frábært fyrir England ef Rice væri búinn að ná sér að fullu og tilbúinn að byrja en miðað við hversu slakur hann var gegn Noregi þá yrði það stór breyting á stuttum tíma. Hann er frábær fótboltamaður en að byrja honum er áhætta sem Tuchel þarf ekki að taka," segir Dunn.