Fótbolti.net

sun 15. mars 2026 16:00

Jóhann Þór Hólmgrímsson

England: Sesko innsiglaði sterkan sigur United - Vítaklúður og rautt á Selhurst Park

Benjamin Sesko innsiglaði sigur Man Utd

Mynd: EPA

Ross Barkley nýtti tækifærið en það dugði skammt

Mynd: EPA

Man Utd vann gríðarlega sterkan sigur á Aston Villa á Old Trafford í baráttunni um Meistaradeildarsæti í úrvalsdeildinni í dag. Emiliano Martinez varði frábærlega skalla frá Amad Diallo eftir rúmlega tuttugu mínútna leik.

Diogo Dalot fékk síðan gullið tækifæri til að koma Man Utd yfir undir lok fyrri hálfleiks en skaut hátt yfir úr góðu færi.

Man Utd náði forystunni snemma í seinni hálfleik þegar Casemiro skallaði boltann í netið eftir hornspyrnu frá Bruno Fernandes. Þetta var sjötta markið hans eftir fast leikatriði en enginn hefur skorað jafn mörg mörk eftir fast leikariði í deildinni á tímabilinu.

Aston Villa jafnaði metin um tíu mínútum síðar. Ross Barkley kom boltanum í netið en VAR skoðaði atvikið þar sem Amadou Onana fékk boltann mögulega í höndina og var í rangstöðu en markið var að lokum dæmt gott og gilt.

Tammy Abraham fékk færi til að koma Aston Villa yfir en hann náði ekki að taka vel á móti boltanum og Dalot kom boltanum frá.

Man Utd refsaði stuttu síðar þegar Matheus Cunha slapp í gegn og kom liðinu aftur yfir. Það var síðan Benjamin Sesko sem innsiglaði sigurinn eftir að hafa komið inn á sem varamaður.

Aston Villa hefði getað klórað í bakkann í blálokin en Douglas Luiz og Aleix Garcia flæktust fyrir hvor öðrum fyrir opnu marki og þetta rann út í sandinn.

Það var mikið um að vera á Selhurst Park þar sem Leeds var í heimsókn hjá Crystal Palace.

Gestirnir fengu tækifæri til að komast yfir á lokaandartökum fyrri hálfleiks þegar vítaspyrna var dæmd en Dominic Calvert-Lewin fór illa að ráði sínu og skaut framhjá.

Stuttu síðar kom upp furðulegt atvik þegar Gabriel Gudmundsson fékk sitt annað gula spjald. Thomas Bramall, dómari leiksins, virtist ekki átta sig á því að hann væri að gefa honum annað gula spjaldið og eftir mótmæli Palace manna lyfti hann loksins rauða spjaldinu.

Crystal Palace réði lögum og lofum í seinni hálfleik en markalaust jafntefli var niðurstaðan.

Það var einnig markalaust þegar Nottingham Forest fékk Fulham í heimsókn. Dan Ndoye, sóknarmaður Forest, kom boltanum í netið eftir rúmlega klukkutíma leik en markið var dæmt af vegna rangstöðu.

Sjáðu úrslit dagsins og stöðutöfluna hér fyrir neðan

Manchester Utd 3 - 1 Aston Villa
1-0 Casemiro ('53 )
1-1 Ross Barkley ('64 )
2-1 Matheus Cunha ('71 )
3-1 Benjamin Sesko ('81 )

Crystal Palace 0 - 0 Leeds
0-0 Dominic Calvert-Lewin ('45 , Misnotað víti)
Rautt spjald: Gabriel Gudmundsson, Leeds ('45)

Nott. Forest 0 - 0 Fulham

		L	U	J	T	ms:	mf:	mun	Stig
1	Arsenal	33	21	7	5	63	26	+37	70
2	Man City	32	20	7	5	65	29	+36	67
3	Man Utd	33	16	10	7	58	45	+13	58
4	Aston Villa	33	17	7	9	47	41	+6	58
5	Liverpool	33	16	7	10	54	43	+11	55
6	Brighton	34	13	11	10	46	39	+7	50
7	Chelsea	34	13	9	12	53	43	+10	48
8	Brentford	33	13	9	11	48	44	+4	48
9	Bournemouth	33	11	15	7	50	50	0	48
10	Everton	33	13	8	12	40	39	+1	47
11	Sunderland	33	12	10	11	36	40	-4	46
12	Fulham	33	13	6	14	43	46	-3	45
13	Crystal Palace	32	11	10	11	35	36	-1	43
14	Newcastle	33	12	6	15	46	49	-3	42
15	Leeds	33	9	12	12	42	49	-7	39
16	Nott. Forest	33	9	9	15	36	45	-9	36
17	West Ham	33	8	9	16	40	57	-17	33
18	Tottenham	33	7	10	16	42	53	-11	31
19	Burnley	33	4	8	21	34	67	-33	20
20	Wolves	33	3	8	22	24	61	-37	17