Skagamenn hafa ekki getað fagnað oft í sumar.
„Joakim Wrele er mögulega hægasti kantmaður sem ég hef séð.
„Það er lágt á okkur risið." segir Sigurður Mikael Jónsson, stuðningsmaður ÍA, en hann talaði hreint út í viðtali við útvarpsþátt Fótbolta.net í dag. Hægt er að hlusta á viðtalið í spilaranum hér að ofan.
ÍA hefur aðeins þrjú stig að loknum sex umferðum í Pepsi-deildinni.
ÍA hefur aðeins þrjú stig að loknum sex umferðum í Pepsi-deildinni.
„Eins og fyrir öll tímabil ríkti eftirvænting fyrir þetta sumar. Vonir stóðu til að það næðist að byggja upp á þann fína árangur sem náðist eftir fína byrjun í fyrra. Liðið endaði bara fjórum stigum frá öðru sætinu," segir Sigurður Mikael.
„Það er talsverður vindur úr stuðningsmönnum ÍA sem virðast búast við því versta fyrirfram."
„Það er neikvætt upplegg hvernig við förum inn í leikina. Það er farið inn í leikina með því hugarfari að tapa ekki í stað þess að fara í þá til að sækja til sigurs. Þetta hefur verið varnarsinnað og varnarleikurinn samt óstöðugur," segir Sigurður Mikael sem getur þó fundið jákvæðan punkt.
„Páll Gísli markvörður blómstrar. Hann fær náttúrulega rosalega mörg skot á sig því liðið liggur aftarlega og ætlar að beita skyndisóknum sem aldrei koma."
Eins og hann hafi ekki spilað fótbolta áður
Þeir erlendu leikmenn sem ÍA fékk fyrir tímabilið hafa verið harðlega gagnrýndir.
„Það hefur komið fram í umræðuþáttum að þeir eru ekki nægilega sterkir og bæta engu við þetta lið virðist vera. Mér finnst þeir ekki nógu góðir. Það hljóta að vera einhverjir kjúklingar sem geta komið inn í þetta og geta ekki mögulega gert verr."
„Joakim Wrele er mögulega hægasti kantmaður sem ég hef séð og stundum er eins og hann sé hræddur við boltann. Hann er með sæmilegar fyrirgjafir samt. Maksims Rafalskis tuddar og lætur finna fyrir sér á miðjunni en ég hef ekki séð hann senda á samherja. Jói Kalli er trekk í trekk að hreinsa upp eftir hann. Svo er það bakvörðurinn Jan Mikel Berg sem mikið hefur verið talað um, hann gekk fram af stuðningsmönnum gegn Stjörnunni. Hann var skelfilegur og lítur út fyrir að hafa ekki spilað fótbolta áður."
Meðal þess sem Skagamenn hafa verið gagnrýndir fyrir er leikstíllinn.
„Þetta hefur legið hjá okkur í svona risaeðlutaktík, hlaupi og öskrum og fara þetta á hörkunni. Þegar þú ert kominn í Pepsi-deildina þar sem vísindin eru orðin mikil og klassinn meiri þá er þetta úrelt pæling. Það sem hefur verið áhyggjuefni sérstaklega er að það virðist ekki vera til plan B hjá þjálfaranum," segir Sigurður Mikael sem bendir þó réttilega á að ekki megi gleyma því að liðið hefur átt erfiða leikjadagskrá í byrjun og mætt liðum sem spáð var í titilbaráttu.
„Þessir leikir sem eru búnir hafa afhjúpað klassamun en við eigum eftir að mæta þeim liðum sem eru í strögglinu með okkur. Eftir KR-leikinn eigum við Keflavík, Víking, Þór og Fylki. Fari þeir leikir illa þá hljóta menn í æðstu stöðum að hugsa sinn gang."
Athugasemdir
