Enska úrvalsdeildarfélagið Newcastle United er búið að ná samkomulagi við Robin Gosens, leikmann Atalanta á Ítalíu, en það er Sky Italia sem greinir frá.
Newcastle ætlar að styrkja hópinn verulega í janúar til að bjarga liðinu frá falli en það hefur þegar fengið þa Chris Wood og Kieran Trippier í þessum mánuði.
Samkvæmt Sky Italia er Newcastle búið að ná samkomulagi við þýska landsliðsmanninn Robin Gosens, sem er á mála hjá Atalanta.
Hann fær þriggja og hálfs árs samning hjá enska félaginu en Newcastle á aðeins eftir að komast að samkomulagi við Atalanta um kaupverð.
Gosens getur spilað bæði sem bakvörður og vængmaður og hefur verið fastamaður í liði Atalanta síðustu ár.
Þjóðverijnn hefur ekkert spilað síðan í september vegna meiðsla aftan í læri en ætti að snúa aftur á völlinn síðar í þessum mánuði.
Athugasemdir