England: Brentford kastaði frá sér tveggja marka forystu gegn botnliðinu

Brentford kastaði frá sér tveggja marka forystu í 2-2 jafntefli liðsins gegn botnliði Wolves í 30. umferð ensku úrvalsdeildarinnar á Community-leikvanginum í Lundúnum í kvöld.

Ítalski bakvörðurinn Michael Kayode skoraði sitt fyrsta deildarmark fyrir Brentford með hörkuskalla eftir fyrirgjöf Keane Lewis-Potter á 22. mínútu.

Sá hefur lengi beðið eftir fyrsta markinu, en hann kom til Brentford fyrir rúmu ári.

Fimmtán mínútum síðar fagnaði brasilíski framherjinn Igor Thiago því að vera kallaður inn í brasilíska landsliðið í fyrsta sinn með því að gera nítjánda deildarmark sitt.

Caoimhin Kelleher, markvörður Brentford, átti stórkostlegan bolta fram völlinn og á Dango Ouattara sem átti enn betri móttöku, komst inn fyrir og lagði boltann til hliðar á Thiago sem skoraði og allt útlit fyrir að Brentford væri að fara ná í þægileg þrjú stig.

Adam Armstrong kom Úlfunum hins vegar aftur inn í leikinn eftir frábæra sókn. Hann færði sig út vinstra megin áður en hann fékk boltann, lék á varnarmann og klíndi boltanum efst í hægra hornið. Frábært mark hjá Armstrong.

Á 74. mínútu gerðu Úlfarnir breytingu sem átti eftir að gera gæfumuninn fyrir þá er Tolu Arokodare kom inn fyrir Jean-Ricner Bellegarde.

Fjórum mínútum síðar jafnaði Arokodare metin með skalla eftir skemmtilega fyrirgjöf Joao Gomes á fjærstöng. Aðeins nokkrum mínútum síðar var Arokodare nálægt því að koma Úlfunum yfir en skalli hans hafnaði í þverslá.

Alvöru innkoma hjá Nígeríumanninum sem var óheppinn að sækja ekki öll stigin fyrir gestina.

Bæði lið reyndu að sækja sigurmark undir lokin en höfðu ekki erindi sem erfiði og lokatölur 2-2. Brentford er áfram án sigurs á heimavelli síðan 7. janúar og Úlfarnir halda áfram að kroppa stig í von um að halda sæti sínu í deildinni.

Brentford er áfram í 7. sæti með 45 stig og Úlfarnir á botninum með 17 stig, tólf stigum frá öruggu sæti.