Manchester City vann sinn annan sigur í ensku úrvalsdeildinni í dag er liðið fékk Arsenal í heimsókn á Etihad völlinn í Manchester.

City hafði byrjað tímabilið örlítið brösuglega og gerði 1-1 jafntefli við Leeds í síðustu umferð eftir 5-2 tap gegn Leicester í annarri umferð.

Arsenal hafði unnið þrjá af fyrstu fjórum leikjum sínum en eina tapið var gegn Liverpool í þriðju umferð deildarinnar, 3-1.

Það var ekki boðið upp á mikið af mörkum á Etihad í dag en það eina kom eftir 23 mínútur er Raheem Sterling kom boltanum í netið.

City sótti hratt á vörn Arsenal sem endaði með skoti Phil Foden á markið sem Bernd Leno varði. Sterling var þó réttur maður á réttum stað og náði frákastinu til að skora.

Bæði félög fengu færi til að skora fleiri mörk en vörn beggja liða hélt og niðurstaðan 1-0 sigur heimamanna sem lyfta sér upp í tíunda sæti deildarinnar.

Arsenal er enn í fimmta sætinu með níu stig, fjórum stigum á eftir toppliði Everton.