Malen, Maguire, Rashford, Greenwood, Yoro, Eriksen og fleiri góðir í slúðri dagsins
   sun 19. mars 2023 16:03
Aksentije Milisic
Danmörk: Hákon skoraði í sigri FCK - Alfreð á skotskónum en Sævar Atli meiddist
Hákon Arnar.
Hákon Arnar.
Mynd: Getty Images
Alfreð og Kolbeinn.
Alfreð og Kolbeinn.
Mynd: Getty Images

22 umferðin var spiluð í dönsku úrvalsdeildinni í dag en þetta var síðasta umferðin í venjulega fyrirkomulaginu. Nú mun deildin skiptast í tvennt þar sem efri hlutinn mun spila innbyrðis og sá neðri.


Mikið var af Íslendingum í eldlínunni en Hákon Arnar Haraldsson skoraði fyrra mark FCK í 2-1 sigri á Viborg. FCK er í öðru sæti deildarinnar, einu stigi á eftir Nordsjælland en toppliðið vann Bröndby með tveimur mörkum gegn einu.

Ísak Bergmann Jóhannesson var ekki í leikmannahópi FCK í leiknum í dag.

Mikael Anderson var í byrjunarliðinu hjá AGF og spilaði hann 78. mínútur. AGF vann OB 1-0 en Aron Elís Þrándarson kom inn af bekknum hjá gestunum á 67. mínútu. AGF er í fjórða sæti deildarinnar og spilar því í efri hlutanum en Odense hafnar í því níunda.

Freyr Alexandersson og lærisveinar hans í Lyngby gerðu 1-1 jafntefli gegn Horsens. Alfreð Finnbogason hélt áfram að skora en hann kom Lyngby yfir á 24. mínútu leiksins. Nokkrum mínútum áður þurfti Sævar Atli Magnússon að fara meiddur af velli en hann fékk þá þungt höfuðhögg.

Spurning hvort að landsleikirnir gætu verið í hættu hjá Sævari en það verður að koma í ljós. Horsens jafnaði metin í síðari hálfleiknum og lauk leiknum með 1-1 jafntefli. Kolbeinn Finnsson spilaði allan leikinn en Alfreð var tekinn útaf í uppbótartímanum.

Hjá Horsens þurfti Aron Sigurðarson að fara meiddur af velli í upphafi síðari hálfleiksins. Liðin munu mætast aftur en þau eru bæði í neðri hlutanum. Lyngby er í næst neðsta sæti deildarinnar á meðan Horsens er einu sæti ofar.

Þá gerðu Silkeborg og Midtjylland 3-3 jafntefli en Elías Rafn Ólafsson var ekki í leikmannahópi Midtjylland.


Athugasemdir
banner
banner