KA nældi í sinn fyrsta sigur í Bestu deildinni í kvöld þegar liðið lagði Fylki af velli í botnslag. Daníel Hafsteinsson skoraði tvö mörk, Fótbolti.net ræddi við hann eftir leikinn.
Lestu um leikinn: KA 4 - 2 Fylkir
„Það eru blendnar tilfinningar. Við byrjuðum mjög vel í fyrri hálfleik en þannig séð ömurlegur seinni hálfleikur en við klárum þetta og við verðum að fagna því," sagði Daníel.
Daníel var ánægður að skora í kvöld.
„Þetta datt fyrir mig í dag. Þetta er búið að liggja í loftinu þannig ég er mjög ánægður með það," sagði Daníel.
Hann fór af velli eftir tæplega klukkutíma leik vegna smávægilegra meiðsla.
„Ég var þvílíkt góður í upphitun síðan er eins og það hafi verið einhver klemma í ökklanum á mér, ég var hálf haltur allan fyrri hálfleikinn, það væri kannski fínt ef ég væri það alltaf. Ég vildi ekki fara út af en þjálfarinn hefur kannski stundum rétt fyrir sér," sagði Daníel léttur.