„Þetta var baráttusigur og við þurftum að krafa djúpt. Það var karakter í liðinu, þetta var hörku leikur og við vitum að Fylkir er ekkert á réttum stað í töflunni. Þeir eru eitt af betri liðum í deildinni og þetta var gríðarlega sterkt" sagði Hermann Hreiðarsson þjálfari HK eftir sigurinn í Árbænum í kvöld.
Lestu um leikinn: Fylkir 1 - 2 HK
„Þetta var ekki besti leikurinn okkar en mönnum langaði í sigur hérna og það var alveg á hreinu og við sýndum það fram á síðustu mínútu hér í kvöld."
HK lenti undir en náði inn jöfnunarmarki rétt fyrir hálfleiksflaut. Hversu sterkt var það að ná þessu jöfnunarmarki rétt fyrir hálfleik?
„Það var gríðarlega mikilvægt fyrir okkur. Þetta var ekki besti hálfleikurinn okkar og það vantaði smá takt í hann að komast í okkar stöður sem við viljum komast í."
Arnar Freyr Ólafsson markmaður HK hefur verið að glíma við meiðsli og þurfti að fara meiddur af velli og Hermann Hreiðarsson vonast til þess að þetta sé ekki of alvarlega. Hemmi hrósar innkomu Ólafs Arnars inn í mark HK í kvöld.
„Mér skilst að þetta hafi bara örlítið tekið sig upp aftur og ég vona að það sé ekki of alvarlegt. Óli kom gríðarlega sterkur inn og var frábær hérna í kvöld þannig við erum heppnir með það að vera með tvo frábæra markmenn, geggjaðir karakterar og þeir styðja hvern annan."
