Á morgun laugardag verða undanúrslitaleikir Fótbolti.net bikarsins á dagskrá, Selfoss og Árbær mætast á JÁVERK-vellinum á Selfossi og á sama tíma tekur KFA á móti Tindastóli í Fjarðabyggðarhöllinni.

Báðir leikirnir hefjast klukkan 13. Úrslitaleikurinn verður svo föstudagskvöldið 27. september á Laugardalsvelli.

Víðismenn unnu keppnina, sem er bikarkeppni neðri deilda, þegar hún var haldin í fyrsta sinn á síðasta ári. Selfyssingar eru sigurstranglegastir í ár, eftir að hafa unnið 2. deildina. Árbær hafnaði í þriðja sæti 3. deildar. Tindastóll vann 4. deildina og KFA endaði í fimmta sæti 2. deildar.