Kynþáttaníð á Ítalíu og í Skotlandi

Leikmenn úr enska landsliðinu urðu fyrir kynþáttafordómum frá stuðningsmönnum búlgarska landsliðsins í síðustu viku og í gær var leikur hætt í enska bikarnum vegna kynþáttafordóma.

Í dag varð Ronaldo Vieira, leikmaður Sampdoria, fyrir kynþáttafordómum frá stuðningmönnum Roma er Sampdoria og Roma áttust við í ítölsku úrvalsdeildinni.

Ítalska fréttaveitan ANSA sagði frá því að apahljóð úr stúkunni hefðu heyrst í fyrri hálfleiknum og hefði þeim verið beint að hinum 21 árs gamla Vieira.

„Ég heyrði það, en ég vil ekki tala um það. Þetta gerist alltof oft, þetta á ekki að vera svona," sagði Vieira.

Vieira gekk í raðir Sampdoria frá Leeds árið 2018.

Corriere dello Sport segir frá því að tilkynnt hafi verið í gegnum hátalarkerfi vallarins að leiknum yrði hætt ef rasisminn héldi áfram.

Roma sendi frá sér afsökunarbeiðni á Twitter eftir leikinn.

AS Roma would like to apologise to Ronaldo Vieira for the racist boos he was subjected to. Roma does not tolerate racism of any kind and the club will support the authorities in identifying and subsequently banning any individuals found guilty of racially abusing the midfielder.

— AS Roma English (@ASRomaEN) October 20, 2019

Kynþáttaníð í Skotlandi til rannsóknar
Kynþáttaníð í garð Ronaldo Vieira í kvöld er langt frá því að vera eina dæmið um kynþáttafordóma í fótboltanum á Ítalíu, en í kvöld bárust fréttir af því að kynþáttafordómar væru til rannsóknar í Skotlandi, nánar tiltekið kynþáttafordómar í leik Hearts og Rangers.

Hearts hefur hótað að banna alla þá stuðningsmenn sem gerast sekir um kynþáttafordóma á leikjum liðsins.

Hearts og Rangers gerðu 1-1 jafntefli í dag, en Alfredo Morelos jafnaði fyrir Rangers stuttu fyrir leikhlé. Talið er að hann hafi orðið fyrir kynþáttafordómum er hann fagnaði marki sínu fyrir framan stuðningsmenn Hearts.

Málið er til rannsóknar hjá Hearts.