2. deild: Kórdrengir of sterkir fyrir Selfoss

Kórdrengir tóku á móti Selfossi í toppslag 2. deildar og úr varð hörkuleikur.

Albert Brynjar Ingason kom Kórdrengjum yfir snemma leiks eftir slakan varnarleik Selfyssinga.

Kenan Turudija og Hrvoje Tokic komust nálægt því að jafna á næstu mínútum en inn vildi boltinn ekki og tvöfaldaði Albert Brynjar forystu heimamanna eftir hornspyrnu.

Tokic minnkaði muninn í upphafi síðari hálfleiks en Jordan Damachoua náði að tvöfalda forystu Kórdrengja á 72. mínútu. Skömmu síðar fékk Óskar Valberg Arilíusson að líta rauða spjaldið og brekkan ansi brött fyrir gestina.

Selfyssingar náðu ekki að skapa mikið meiri usla og niðurstaðan 3-1 sigur Kórdrengja, sem eru svo gott sem komnir upp í Lengjudeildina.

Kórdrengir eru með sex stiga forystu á toppi deildarinnar þegar fjórar umferðir eru eftir. Selfoss deilir öðru sætinu með Þrótti V. sem er með betri markatölu og kemur Njarðvík í fjórða sæti, einu stigi á eftir.

Það tekur tíma fyrir stöðutöfluna að uppfærast.