2. deild: Fjölnir stöðvaði topplið Hauka

Egill Otti Vilhjálmsson og Viktor Andri Hafþórsson reyndust hetjurnar í Grafarvoginum þegar þeir skoruðu sitthvort markið með fimm mínútna millibili í fyrri hálfleik.

Fjölnir leiddi 2-0 þar til Ólafur Darri Sigurjónsson minnkaði muninn á lokakaflanum, en nær komust Hafnfirðingar ekki. Lokatölur urðu því 2-1 fyrir Fjölni.

Haukar eru með fimm stiga forystu á toppi deildarinnar sem stendur, með 29 stig eftir 14 umferðir. Fjölnir er í fjórða sæti með 21 stig. Fjölnismenn töpuðu 5-2 gegn Magna á Grenivík í síðustu umferð og svöruðu menn fyrir sig í kvöld.

Í hinum leik kvöldsins hafði Kári betur á útivelli gegn Hvíta riddaranum. Kári fer upp í 2. sæti deildarinnar með sigri, þar sem liðið á 24 stig eftir 14 umferðir.

Grétar Jónatan Pálmason skoraði eina markið í fyrri hálfleik skömmu fyrir leikhlé áður en Árni Salvar Heimisson tvöfaldaði forystuna í síðari hálfleik.

Alexander Aron Tómasson var fljótur að minnka muninn fyrir heimamenn en Matthías Daði Gunnarsson gerði út um viðureignina á 81. mínútu, svo lokatölur urðu 1-3.

Hvíti riddarinn situr eftir í fallsæti með 13 stig eftir 14 umferðir.

Fjölnir 2 - 1 Haukar
1-0 Egill Otti Vilhjálmsson ('31 )
2-0 Viktor Andri Hafþórsson ('36 )
2-1 Ólafur Darri Sigurjónsson ('79 )

Hvíti riddarinn 1 - 3 Kári
0-1 Grétar Jónatan Pálmason ('44 )
0-2 Árni Salvar Heimisson ('63 )
1-2 Alexander Aron Tómasson ('65 )
1-3 Matthías Daði Gunnarsson ('81 )