Sigurður Heiðar Höskuldsson þjálfari Þórs svaraði spurningum eftir að hafa mætt KA í úrslitaleik Kjarnafæðismótsins í kvöld.
Lestu um leikinn: Þór 8 - 7 KA
Þór náði forystunni í síðari hálfleik en KA-menn jöfnuðu á lokamínútunum svo grípa þurfti til vítaspyrnukeppni til að skera úr um sigurvegara.
„Mér fannst leikurinn skrýtinn, mér fannst við byrja hann mjög illa. Við komumst aðeins inn í hann í fyrri hálfleik en heilt yfir vorum við ekkert sérstaklega góðir. Það var svolítið hátt spennustig á okkur," sagði Siggi Höskulds sem virtist ekki sérlega hress að leikslokum.
„Í seinni hálfleik voru kaflar góðir og svo fórum við eitthvað að reyna að verja þetta og féllum aðeins aftarlega og vorum pínu smeykir einhvern veginn að stíga upp, sérstaklega eftir að við fengum ódýr færi á okkur gegn Fylki í síðasta leik. Það var í rauninni tiltölulega eina markmið leiksins og vikunnar að bæta fyrir það sem fór úrskeiðis. Við breyttum aðeins í uppspilinu og uppstillingunni þannig það var ekki alveg nógu mikill taktur í spilinu okkar. Heilt yfir er ég bara ánægður að vinna bikar og við vorum nálægt því að klára þetta í venjulegum leiktíma.
„Heilt yfir var frammistaðan ekki nægilega góð en við bættum það sem við ætluðum að bæta þannig að ég er ánægður með það. Við þurfum að vera betri þegar við mætum FH."
KA fékk nokkur dauðafæri í fyrri hálfleiknum og viðurkennir Siggi að sínir menn hafi verið heppnir að vera ekki undir í leikhlénu.
„Ég hef sjaldan séð svona mikið af dauða dauða dauðafærum í leik sem fara forgörðum. Við fengum þrjú dauða dauða og þeir örugglega fjögur eða fimm. Við vorum alveg heppnir líka."
