Auglýsingin í fyrra vakti mikla athygli og það er óhætt að segja að auglýsingin í ár sé ekki síðri. Fyrrum landsliðsmarkvörðurinn Hannes Þór Halldórsson leikstýrir auðvitað auglýsingunni.

Leikmenn, þjálfarar, stjórnarmenn og fréttamenn koma fyrir í auglýsingunni með söngvarann Jón Jónsson í broddi fylkingar.

Ólympíumeistarinn Erin McLeod er mætt í Bestu deildina og í auglýsinguna má sjá þegar hún spyr eiginkonu sína, Gunnhildi Yrsu Jónsdóttur, út í það af hverju þær fluttu frá Orlando. Einnig koma þjálfararnir Arnar Gunnlaugsson og Óskar Hrafn Þorvaldsson við sögu.

Þá má sjá þegar bræðurnir Jón Rúnar og Viðar Halldórssynir leggja línurnar fyrir Heimi Guðjónsson, þjálfara FH.

Þessa skemmtilegu auglýsingu má sjá í heild sinni hér fyrir neðan en Besta deild karla hefst 10. apríl næstkomandi.