Fótbolti.net ræddi við Mikael Egil Ellertsson eftir 2-2 jafntefli liðsins gegn Kanada í æfingaleik í dag.
Lestu um leikinn: Kanada 2 - 2 Ísland
„Það var nóg að gerast í þessum leik. Það var kalt og erfiðar aðstæður að spila í. Við reyndum að spila okkar leik en þetta var erfiður leikur og erfiðar aðstæður," sagði Mikael.
Orri Steinn Óskarsson skoraði bæði mörk liðsins en hann skoraði seinna markið með góðu skoti eftir laglegan undirbúning Mikaels.
„Þegar fyrirliðinn kemur til baka, hann er með helvítis löpp, getur klárað færin, það er helvíti gott. Við viljum alltaf að framherjinn klári færin sín," sagði Mikael.
Mikael fékk á sig vítaspyrnu eftir rúmlega klukkutíma leik fyrir litlar sakir og Jonathan David skoraði fyrra mark Kanada í kjölfarið. Leikmaður Kanada fékk síðan rauða spjaldið undir lok leiksins fyrir að gefa Mikael olnbogaskot.
„Þetta er fyndið, þetta er ekki víti sko. Ég spyr líka gæjann sem datt. Hann sagði bara 'ekki séns' og fór að hlæja undir treyjunni. Alltaf svekkjandi að missa forystu. Kannski ef það hefði verið VAR þá veit maður aldrei. Þetta rauða spjald er líka soft. Hann kemur með olnbogann í smettið á mér en þetta er ekki rautt," sagði Mikael
„Ég heyrði línumanninn segja 'rautt, rautt'. Ég tek því en þetta var ekki rautt."
Athugasemdir
