Orri skoraði tvö gegn Kanada.
Ísland gerði 2-2 jafntefli gegn Kanada ytra í æfingaleik í dag. Fótbolti.net ræddi við Orra Stein Óskarsson, sem skoraði bæði mörk Íslands, eftir leikinn.
Lestu um leikinn: Kanada 2 - 2 Ísland
„Blendnar tilfinningar. Persónulega mjög glaður að vera kominn aftur og byrja svona. Líka svekkjandi að hafa ekki náð að klára leikinn jafnvel þó að 2-2 úti á móti Kanada séu ekki verstu úrslit í heimi þá viljum við samt klára svona leiki og við vitum að við eigum að gera það," sagði Orri Steinn.
Hann skoraði bæði mörkin í fyrri hálfleik en Jonathan David skoraði bæði mörk Kanada úr vítum í seinni hálfleik.
„Þeir voru búnir að elta okkur allan leikinn og erfitt að spila svo stíga þeir upp um gír í seinni hálfleik og við náum ekki að svara nógu vel sem gerir það að verkum að þeir ná að koma leiknum í sínar eigin hendur."
Orri Steinn er í landsliðshópnum í fyrsta sinn í dágóðan tíma en hann hefur verið ansi óheppinn með meiðsli í kringum landsliðsverkefni.
„Þegar maður kemur til baka þarf ekki langan tíma til að aðlagast. Maður þekkir þessa stráka eins og lófan á hendinni sinni. Maður efast ekki um hvað þeir eru að fara gera, mér leið eins og maður hafi aldrei farið. Maður tekur þessu ekki sem sjálfsögðum hlut að koma hingað og spila með þessum strákum og fá að vera partur af þessu, mjög þakklátur," sagði Orri.
Hann skoraði fyrra markið þegar hann náði boltanum eftir arfaslaka sendingu til baka frá varnarmanni Kanada og seinna markið eftir laglegan undirbúning Mikaels Egils Ellertssonar.
„Þetta er einn af mínum styrkleikum, að vera rólegur undir pressu. Þó maður fái aðeins meiri tíma getur þetta verið meira stressandi. Þetta er eitthvað sem ég hef æft frá því ég var lítill, það er undir mér komið að nýta svona færi," sagði hann um fyrra markið.
„Frábær sending hjá Mikka. Upp í nær, það gerist varla flottara en það," sagði Orri um seinna markið.
Athugasemdir
