Óskar Sigurðsson, formaður knattspyrnudeildar Selfoss, segir ekkert til í sögu um veðmálasvindl í leik liðsins gegn Fjarðabyggð í næstsíðustu umferð árið 2008.
Viðar Örn Kjartansson var í ítarlegu viðtali við Fótbolta.net í dag þar sem hann talaði um sögu sem hefur gengið um meint veðmálasvindl í leik Fjarðabyggðar og Selfoss í næstsíðustu umferðinni í 1. deildinni árið 2008. Selfoss tapaði leiknum 2-1 og missti fyrir vikið af sæti í Pepsi-deildinn.
,,Menn hafa talað um veðmálasvindl í leiknum á móti Fjarðabyggð. Þetta er kannski einhver grín saga og ég veit ekki hvað er til í þessu en það var búið að veðja óeðlilega mikið á að Fjarðabyggð sem var í 10. sæti myndi vinna þennan leik. Þetta átti að vera skyldusigur fyrir okkur,“ sagði Viðar meðal annars.
Óskar segir að Selfyssingar telji ekki að eitthvað óeðlilegt hafi átt sér stað í leiknum.
,,Eins og hann segir sjálfur þá er þetta bara einhver grín saga. Við töpuðum bara þessum leik og misstum af sætinu," sagði Óskar við Fótbolta.net í dag.
Zoran Miljkovic var þjálfari Selfyssinga á þessum tíma en hann tók aftur við Selfyssingum í haust. ,,Ef það væri eitthvað til í þessu þá væri Zoran auðvitað ekki hjá okkur í dag," sagði Óskar einnig um söguna.
Athugasemdir