Viborg 0-1 Lyngby
0-1 Jeppe Kjær (´43)
0-1 Jeppe Kjær (´43)
Það er óhætt að segja að Hallgrímur Jónasson fari frábærlega af stað með nýja félaginu sínu, Lyngby sem eru nýliðar í dönsku úrvalsdeildinni.
Hallgrímur gekk til liðs við nýliðana í sumar en hann missti af byrjun tímabilsins vegna meiðsla og er nýkominn af stað.
Hann var í fyrsta skipti í byrjunarliði síðastliðinn mánudag þegar Lyngby vann 1-0 sigur á AaB. Hallgrímur hóf svo leik á bekknum gegn Bröndby á fimmtudag en kom inná og hjálpaði liðinu að innbyrða annan 1-0 sigur.
Hallgrímur var svo í byrjunarliði Lyngby í dag þegar liðið heimsótti Viborg. Úrslitin urðu þau nákvæmlega sömu og í síðustu tveim leikjum því Jeppe Kjær skoraði eina mark leiksins skömmu fyrir leikhlé og tryggði Lyngby þriðja 1-0 sigurinn á innan við viku.
Lyngby er þar með komið upp í sjötta sæti deildarinnar með sautján stig.
Athugasemdir